’n Hof in die Verenigde Arabiese Emirate het lewenslange vonnisse aan meer as 40 politieke aktiviste opgelê nadat hulle aan terreuroortredings skuldig bevind is.
Staatsmedia het gesê die Abu Dhabi Federale Appèlhof het die beskuldigdes skuldig bevind vir die skep van ‘n terroriste-organisasie.
Verenigde Nasies se kundiges en regte-groepe het die massaverhoor erg gekritiseer. Human Rights Watch (HRW) het gesê meer as 80 mense – bekend as die “VAE 84” – is verhoor.
Verlede Januarie het die VAE se aanklaer-generaal die beskuldigdes na die Abu Dhabi Federale Appèlhof verwys op aanklagte van “die vorming van ‘n geheime organisasie met die doel om terreur- en gewelddade uit te voer” in die land.
Volgens die amptelike WAM-nuusagentskap het die Abu Dhabi Federale Appèlhof Woensdag “43 beskuldigdes tot lewenslange tronkstraf gevonnis vir die misdaad van die skep, stigting en bestuur van ‘n terroriste-organisasie”.
Benewens die 43 lewenslange vonnisse wat uitgedeel is, is 10 ander beskuldigdes vir 10 tot 15 jaar tronkstraf opgelê, het WAM gesê. Dit het bygevoeg een beskuldigde is vrygespreek en 24 sake is ontoelaatbaar verklaar.
Die grootste deel van die beskuldigdes is al meer as ‘n dekade in die tronk nadat hulle as deel van die “VAE 94”-verhoor in 2013 in die tronk gesit is, volgens HRW en Amnesty International. Baie het reeds hul vonisse uitgedien.
Die VAE-owerhede sê egter die jongste aanklagte is “wesenlik verskillend” van dié wat in 2013 voor di hof gebring is, wat nie beskuldigings van die finansiering van ‘n “terreurorganisasie” ingesluit het nie, het AFP berig.
Volgens Amnestie Internasionaal is die aanklag, aanklagte, prokureurs en name van beskuldigdes “geheim gehou deur die regering”.
Daar word gesê inligting is slegs deur “lekkasies” bekend.
In reaksie op die vonnisopleggings het Amnesty International se Devin Kenney die VAE aangemoedig om “dringend hierdie onwettige uitspraak te herroep” en ‘n beroep gedoen om diegene wat gevonnis is vry te laat.
“Die verhoor was ’n skaamtelose parodie op geregtigheid en het verskeie fundamentele beginsels van die reg geskend, insluitend die beginsel dat jy nie dieselfde persoon twee keer vir dieselfde misdaad kan verhoor nie, en die beginsel dat jy nie mense terugwerkend kan straf ingevolge wette wat nie bestaan het ten tye van die beweerde oortreding nie.”
Ten spyte daarvan dat dit een van die rykste lande in die Midde-Ooste is en hoëtegnologie-sektore en innovasies bevorder, bly die VAE beperkend op politieke aktiwiteite. Die federasie van sewe state, wat Abu Dhabi en Dubai insluit, het geen amptelike opposisie nie en verbied politieke partye.
In 2013 is byna 70 Islamiete tronkstraf opgelê oor ‘n beweerde komplot om die regering omver te werp.
