Barkly-Oos – Twee verdagtes is vanoggend, 12 Junie 2024 gearresteer vir die aanval op ‘n 69-jarige boer op 09 Junie 2024 op sy plaas in Barkly-Oos.
Na bewering was die bejaarde slagoffer op 9 Junie 2024 omstreeks 21:30 op pad na die kragopwekkerkamer wat sowat 15 meter van die huis af is toe hy deur ‘n onbekende persoon aangeval en in die nek gesteek is. Hy het daarin geslaag om terug in die huis te kom en is deur sy seun na die hospitaal gehaas.
SAPD Barkly-Oos-lede was omstreeks 07:15 op pad na Aliwal-Noord toe hulle twee mans gewaar wat langs die pad stap wat by die beskrywing van die moontlike verdagtes pas. Toe hulle die polisie sien, het die mans begin hardloop, maar is aangekeer.
Speurders ondersoek ook hul moontlike skakels met ander gevalle van huisbraak in die gebied.
Die twee verdagtes van 27 en 32 jaar oud sal môre, 13 Junie 2024 in die Barkly-Oos-landdroshof verskyn op aanklagte van poging tot moord, die besit van onwettige ammunisie en die besit van ‘n gevaarlike wapen.
