Mercedes-Benz Suid-Afrika (MBSA) sê hulle verminder die drie skofte by hul aanleg in Oos-London na slegs twee skofte. ‘n Potensiële verlies van 700 poste hang in die weegskaal.
Die C-klas Mercedes Benz word by die Oos-London aanleg gebou vir beide die paaslike en oorsese markte. Meer as 90% van die voertuie word uitgevoer. Daar is in 2023 net meer as 88 000 eenhede voorsien en daar is ongeveer 3 000 werknemers in diens van die MBSA.
MBSA sê hulle is besig met ‘n konsultasie proses volgens Seksie 189(3) van die Wet op Arbeidsverhoudinge wat gefokus is op die herstrukturering van sy vervaardigingslyn.
“Die afgelope jare het die motorbedryf met verskeie uitdagings te kampe gehad, wat ook MBSA en sy verskaffers beïnvloed het,” sê die plaaslike tak van die Duitse premium motorhandelsmerk.
“Hierdie uitdagings sluit in verslegtende makro-ekonomiese toestande en langdurige hawe-uitdagings.
“Algehele verbruikersentiment het gely as gevolg van fluktuasies in die wisselkoers, gedempte huishoudelike inkomste, stygende brandstofpryse, asook verhoogde energie- en logistieke koste.
“Ten tye van publikasie het ons verskeie maatreëls ingestel om die prestasie van ons vervaardigingsbedrywighede aan te spreek en te verbeter, insluitend kostebesparende inisiatiewe en doeltreffendheidsverbeterings.
“Ten spyte van ons beste pogings bly die huidige bedryfsomgewing egter uitdagend, wat verdere optrede noodsaak om die langtermyn volhoubaarheid van ons vervaardigingsbedrywighede te verseker.”
MBSA het in Mei na raming 478 nuwe voertuie aan die binnelandse mark verkoop en 7 500 eenhede uitgevoer. Dit is volgens data van Naamsa, Die Automotive Business Council.
Mercedes-Benz binnelandse verkope het so onlangs as 2020 meer as 1 000 eenhede per maand bereik.
Premium motorverkope het in Suid-Afrika gedaal weens die sukkelende binnelandse ekonomie, met verbruikers wat toenemend goedkoper alternatiewe van ingevoerde handelsmerke verkies.
MBSA is ook gedwing om R100 miljoen plus aan sonkragprojekte te bestee om groen te word en onbetroubare elektrisiteitsvoorsiening van Eskom teë te werk.
Wêreldwyd het Mercedes-Benz Motors se verkope in die eerste kwartaal 463 000 eenhede bereik – ‘n daling van 8%.
Verwerk deur Creamer Media Reporter
engineeringnews.co.za
