Sommige inwoners van Pretoria glo dat burgemeester Nasiphi Moya in droomwêreld leef nadat sy in haar stadsrede beweer het dat daar slegs vyf slaggate in die stad is wat nie herstel is nie.
’n Munisipale werker wat ingestem het om anoniem te praat, het gesê slaggate word reeds maande lank geïgnoreer.
“Niks word gedoen nie. Jy voel soos ’n dronkaard wat in Haarhoffstraat van 18de Laan na 21ste Laan ry, waar daar maklik omtrent 30 slaggate is,” het die werker gesê.
Die werker het gesê sommige van die slaggate is maande lank onbewaak gelaat, terwyl sommige so sleg herstel is dat hulle binne weke weer opgeduik het.
“Ja, hulle beweer dat hulle ’n hele klomp slaggate reggemaak het, maar hulle maak hulle so sleg reg dat hulle weer verskyn na die eerste reën.”
DA-raadslid Marika Kruger Muller het gesê dit is ‘n stryd om slaggate in wyk 70 reg te maak.
“Die hele Centurion (streek 4) het ‘n gebrek aan dienslewering oor hierdie kwessie. Inwoners en raadslede rapporteer die klagtes al weke aaneen en geen reaksie of aksie van die departement nie. Aanvanklik was die verskoning dat daar geen asfalt was nie, toe was dit as gevolg van die weer,” het sy gesê.
Kruger Muller het gesê daar was ‘n paar weke sonder reën, maar geen slaggate is reggemaak nie.
Moya het beweer dat 692 slaggate van die vorige administrasie “geërf” is, maar 687 daarvan is reggemaak. Geërfde slaggate behoort egter nie die stadsraad te verhinder om hul pligte en take uit te voer nie.
Die Stad Tshwane het nog nie kommentaar gelewer oor die toestand van die paaie in die hoofstad en die agterstand in herstelwerk aan slaggate nie.
DA-wyksraadslid Leon Kruyshaar het gesê die slaggate in sy wyk is so groot dat hulle soos kraters op die maan lyk. Kruyshaar het gesê sommige van die mees problematiese slaggate is op hoof- of besige strate soos Mootstraat, Van der Hoffweg, Friedastraat en Markstraat.
DA Tshwane se skadu-MMC van paaie en vervoer, Dikeledi Selowa, het gesê die stad verkoop asfalt om die stad se inkomste te verhoog ten koste van inwoners se veiligheid en bandskade.
Sy het gesê inwoners in baie wyke het dit op hulself geneem om die slaggate met teer of selfs sand te vul.
