Die Valke in die Oos-Kaap het die voormalige Gqeberha Acres Spar-hoofbestuurder Nicole Bekker (37) en die voormalige boekhouer Chantelle Erasmus (48) in hegtenis geneem op aanklagte van bedrog, diefstal en geldwassery van R2,3 miljoen.
Die twee is op Woensdag, 23 April, deur die Gqeberha Ernstige Kommersiële Misdaad-ondersoekeenheid van die Valke in hegtenis geneem en hulle het dieselfde dag in die hof verskyn en is elk op borgtog van R5 000 vrygelaat.
Ao Ndiphiwe Mhlakuvana, woordvoerder van die Valke, het gesê tussen 2021 en 2023 het Bekker en Erasmus na bewering saamgesweer om daaglikse winkelkontant te wanbestee.
Van hul pligte was om die winkel se kontant op te teken en gereeld in die besigheidsbankrekening te deponeer.
Mhlakuvana het egter gesê die twee het na bewering die geld in hul sak gesteek en dit in dele onder mekaar gedeel.
“In sommige gevalle het die verdagtes glo ‘n ander persoon beveel om kontant in dieselfde rekening te deponeer,” het Mhlakuvana gesê.
Hy het gesê teenstrydighede is tydens ‘n oudit opgetel, en die saak is na die Valke verwys vir verdere ondersoek.
“Ondersoeke het die bewerings bevestig dat die verdagtes saamgespan het met die opset om uit die winkel te steel. As gevolg hiervan het Spar ‘n finansiële verlies van R2,3 miljoen gely,” het Mhlakuvana gesê.
Mhlakuvana het gesê die saak is tot 17 Junie uitgestel vir die verdediging om afskrifte van die dossier te ontvang.
Die twee staan tereg op aanklagte van bedrog, diefstal en geldwassery.
Intussen het waarnemende provinsiale hoof van die Valke, brigadier Romeo Fredrick Petrus, die inhegtenisnemings verwelkom en die Gqeberha-span geloof dat hulle ‘n deeglike ondersoek verseker het.
