Die saak teen ‘n Gautengse egpaar wat daarvan beskuldig word dat hulle ‘n kinderpornografieverspreidingsring bestuur het, is tot Junie uitgestel.
Die staat het onthul dat dit honderde ure geneem het om al die materiaal van die beskuldigdes se elektroniese toestelle af te laai. Plaaslike polisie word deur internasionale polisie-eenhede bygestaan om materiaal verder uit te sorteer.
“Hierdie soort ondersoek kan nie deur een man alleen gedoen word nie. Die ondersoek is aan die gang, maar dit is nog lank nie afgehandel nie. Die grootste bewering is dat die beskuldigdes in kripto-geldeenheid handel gedryf het, wat op sigself ‘n uitdaging vir die ondersoek inhou, en hier word ons deur die private sektor bygestaan,” het die staatsadvokaat gesê.
Sy het bygevoeg dit is moeilik om te skat hoe lank die ondersoeke gaan neem.
Darren Wilken en Tiona Moodley het in die Randburg-landdroshof verskyn waar die landdros die saak tot 20 Junie uitgestel het hangende verdere ondersoeke.
Wilken (35) is op 17 Januarie in Midrand in hegtenis geneem. Moodley (25) is op 23 Januarie in hegtenis geneem.
Die paartjie sal in aanhouding bly aangesien hul borgtogaansoek geweier is.
Wilken sal om regshulp aansoek doen. Hy het beweer die regspan wat hom voorheen verteenwoordig het, “was nie beskikbaar nie”. Hy het aan die hof gesê sy ma het hom aangeraai om om regshulp aansoek te doen.
Die hof het ook gehoor dat verdere aanklagte by die egpaar se klagstaat gevoeg kan word.
Wilken staar veelvuldige aanklagte in die gesig, insluitend veelvuldige aanklagte van die besit, skepping en verspreiding van kinderpornografie, die Oortreding van die Wet op Dwelmhandel, verkryging, besit/gebruik van die opbrengs van onwettige aktiwiteite, besit van gesteelde eiendom en bedrog.
Moodley staan tereg op aanklagte van die vervaardiging en verspreiding van kinderpornografie wat op ‘n webwerf aangebied word, sowel as aanklagte van geldwassery.
Die Batebeslagleggingseenheid (AFU) van die Nasionale Vervolgingsgesag (NVG) het vroeër vandeesmaand toestemming gekry om beslag te lê op Wilken se bates as deel van die ondersoek.
Phindi Mjonondwane, NVG-woordvoerder in Gauteng, sê daar is ook beslag gelê op Wilken se luukse voertuig.
“Dit weerspieël ‘n registrasienommer KIDZ NA GP. Die luukse voertuig, hoë-end elektroniese toerusting en R647 300 kontant was die onderwerpe van die deursoeking en beslagleggingslasbrief,” het sy gesê.
