’n 37-jarige verdagte is Vrydag in Winterveldt gearresteer vir diefstal en peuter met noodsaaklike infrastruktuur nadat die polisie beslag gelê het op 28 gesteelde Eskom-transformators ter waarde van ongeveer R1,7 miljoen.
Die arrestasie het plaasgevind tydens ‘n intelligensie-gedrewe operasie Vrydag toe SAPD-lede, saam met Eskom-ondersoekers en -tegnici opgetree het op intelligensie rakende onwettige elektrisiteitsverbindings in die gebied. Die verdagte is in besit gevind van ‘n Eskom-transformator en ander elektriese toerusting, wat gelei het tot sy onmiddellike arrestasie.
Die polisie het onthul dat ondersoek ook 27 onwettig gekoppelde Eskom-transformators regoor die gebied ontdek het.
“Verdere ondersoeke het 27 bykomende onwettig gekoppelde Eskom-transformators regoor die gebied ontbloot. Voorlopige skattings deur Eskom-amptenare dui daarop dat hierdie onwettige verbindings ‘n inkomsteverlies van ongeveer R90 miljoen tot gevolg gehad het,” het lt kol Amanda van Wyk gesê.
Die verdagte sal na verwagting vandeesweek in die Rietgat-landdroshof verskyn. Intussen het die span op Woensdag, 5 Maart, in ‘n aparte operasie ook 13 onwettig gekoppelde transformators in Diepsloot en Erasmia uitmekaar gehaal en daarop beslag gelê, met ‘n geraamde inkomsteverlies van R19 miljoen.
“Sedert sy stigting in 2022 het die NATJOINTS Energieveiligheid en Sekuriteit-werkstroom voorvalle van sabotasie en kriminele aktiwiteite wat Eskom se bedrywighede raak aansienlik ingekort,” het Van Wyk bygevoeg.
Winterveldt is ‘n groot dorp in die Gauteng provinsie van Suid-Afrika. Die dorp is geleë op die noordwestelike hoek van die Stad Tshwane Metropolitaanse Munisipaliteit, aangrensend aan Mabopane.
