Kelly Smith se verklaring aan die SAPD na aanleiding van haar dogtertjie se verdwyning is as bewysstuk ingedien tydens die hofverrigtinge.
Die staat het gister sy tweede getuie, konstabel Luzuko Kobese, na getuiebank geroep.
Konstabel Kobese was een van die polisiebeamptes wat by Saldanha SAPD gestasioneer was en was die eerste wat gereageer het op die oproep oor ‘n vermiste kind.
Terwyl die meeste van sy getuienis dié van sy kollega, konstabel Yanga Gongotha, die staat se eerste getuie, bevestig het, was konstabel Kobese ook die een wat die ma van die vermiste meisie se verklaring afgeneem het.
Joshlin het op Maandag 19 Februarie verdwyn en is na bewering om 17:00 laas gesien. Ten tye van haar verdwyning is sy laas gesien met ‘n ligblou t-hemp, ‘n denimbroek en pienk pantoffels.
Jacquen ‘Boeta’ Appollis, Steveno van Rhyn en Kelly Smith het voor regter Nathan Erasmus verskyn. Die trio staan tereg op aanklagte van mensehandel en ontvoering.
Die polisiebeampte het aan die hof verduidelik hoe hulle almal, met Kelly wat hulle vergesel het, gery het aangesien hulle nie net na haar vermiste dogter gesoek het nie, maar ook na die man in wie se sorg sy (Joshlin) agtergelaat is – ‘Boeta’.
Die beskuldigdes het verveeld toegekyk terwyl die SAPD lid sy getuienis gelewer het. Daar is gesien hoe Boeta rondkyk, gedurig na die plafon kyk, terwyl Van Rhyn vas aan die slaap was. Hy het sy hande in ‘n biddende posisie gehad met sy elmboë op die tafel voor hulle. Daar is gesien hoe Kelly aantekeninge op ‘n notaboek neerskryf elke oomblik wat die polisiebeampte haar naam genoem het.
Terwyl konstabel Kobese voortgegaan het met sy getuienis, het Boeta en Kelly na mekaar gekyk en hy het haar aangemoedig om na die besonderhede te luister terwyl hy met sy vingers na sy ore wys. Weer het sy op haar notaboek begin skryf.
Jacquen Appollis, Steveno van Rhyn en Kelly Smith het voor regter Nathan Erasmus in die White City Veeldoelige Sentrum in Saldanhabaai verskyn in verband met die verdwyning van Joshlin Smith.
Konstabel Kobese het gesê daar was ‘n meningsverskil tussen Kelly en Boeta, maar hy kon nie uitmaak waaroor dit gaan nie, aangesien dit in Afrikaans was.
“Dit het gelyk of hy nie met ons saamwerk nie. Ons moes hom meer as een keer vrae vra en dit was asof hy nie wou antwoord nie,” het hy aan die hof gesê.
Kelly, wat aanvanklik aan die polisie gesê het sy het uitgevind Joshlin was vermis toe sy van die werk af teruggekeer het, het haar storie verander.
In haar verklaring het sy gesê: “Omstreeks 13:50 het ek van die werk af teruggekeer huis toe. My kêrel, Jacquen, was nie by die huis nie, en ek het net twee kinders gekry. Ek het hulle gevra waar Joshlin is, en hulle het gesê hulle weet nie. Ek het uitgegaan om haar te soek, en die pa het ook na die kind gesoek.”
Kelly het ‘n beskrywing van Joshlin se kleredrag gegee en gesê die polisie het haar aangeraai om ‘n ondersoek na ‘n vermiste persoon aan te meld.
“Dit is die eerste keer dat sy nie terugkom huis toe nie, al speel sy,” lui die verklaring.
Aradhan Heeramun, staatsaanklaer, het deur die polisiebeampte bevestig dat Kelly die verklaring onderteken het nadat sy bevestig het sy verstaan en stem saam met wat hy geskryf het.
Toe hy gevra is hoe dit met Boeta in hierdie tyd gegaan het, het hy gesê: “Boeta het soos een onder druk voorgekom en geweier om die polisie se vrae te beantwoord”.
Advokaat Heeramun het ook vir konstabel Kobese gevra om Kelly se houding te verduidelik toe hy die verklaring buite naby haar huis geneem het.
“Sy het kalm voorgekom. Gewillig om antwoorde te gee, maar op sommige punte het dit gelyk of sy huiwerig geword het oor sommige vrae. Tydens die verklaring het die vrae wat gestel is haar onder druk geplaas en meer nog, toe omstanders haar gevra het of die kind nog lewe. Sy was huiwerig om te antwoord,” het konstabel Kobese getuig.
Hy het aan die hof gesê hy het vir Kelly gevra of sy bereid was om daardie aand by die huis te slaap onder die omstandighede – inwoners het op haar geskree – en sy het nee gesê en hy het haar na ‘n familielid se huis geneem.
Konstabel Kobese het gesê nadat die verklaring afgehandel is, was Kelly weer kalm en kon hy selfs nou behoorlik praat, nadat die vrae van omstanders opgehou het.
Tydens die verskyning van die eerste getuie in die saak het Appollis se regsadvokaat, Fanie Harmse, elke aspek van die getuienis van konstabel Yanga Gongotha deurgegaan.
Hy het onwrikbaar gebly om die reaksietye te wil weet, en hoekom dit was soos dit was. Regter Nathan Erasmus het tydens die langdradige kruisondervraging tussenbeide getree en gevra wat die relevansie is.
Tydens ondervraging het dit gelyk of Harmse ook die polisiekonstabel se getuienis in hoof verkeerd neergeskryf het aangesien hy weer eens deur regter Erasmus reggehelp is.
“Nee, meneer Harmse. Die getuie se getuienis was dat toe hulle op die klagte van ‘n vermiste kind gereageer het, daar twee vroue was. Een verder agter en die ander een wat met hulle gepraat het.
“Dit is dus verkeerd om te sê beskuldigde drie (Kelly Smith) was alleen,” het regter Erasmus gesê.
Harmse het verder gesê dat die getuienis wat sy kliënt (Appollis) gelewer het oor die laaste sien van Joshlin om 14:00 toe sy vertrek het om te gaan speel, aangesien hy en sy vriende gerook het, nie waar is nie.
Hy het ook gesê dat sy kliënt die getuienis van die polisiebeampte dat ‘n saamrygeleentheid aan hom gegee is of dat hy ooit met Kelly gepraat het, onwaar is.
