Die saak teen ‘n paartjie, betrokke by ‘n kinderpornografiese verspreidingsring, is tot Februarie uitgestel.
Darren Wilken en Tiona Moodley het Dinsdag in die Randburgl anddroshof verskyn waar die hof beslis het dat die saak uitgestel word sodat die egpaar se borgtogaansoek voortgesit kan word en dat polisieondersoekers beide Wilken en Moodley se adresse kan verifieer.
Die paartjie is binne dae ná mekaar in hegtenis geneem ná ‘n klopjag by Wilken se huis in Midrand op 17 Januarie.
Wilken, 35 jaar oud, is aanvanklik in hegtenis geneem ná die ontdekking van duisende pornografiese video’s en beelde in sy besit.
Hy staan tereg op aanklagte insluitend; bedrog, besit en verspreiding van kinderpornografie, besit van vermoedelik gesteelde eiendom en oortreding van die dwelmhandelwet.
Ten tye van sy arrestasie het polisiewoordvoerder kolonel Amanda van Wyk gesê daar is beslag gelê op ‘n aantal elektroniese toestelle wat vermoedelik kinderpornografie bevat.
Van Wyk het gesê verdere ondersoek deur die Serial and Electronic Crime Investigations (SECI)-spanne het aan die lig gebring dat die verdagte kinderpornografie op ‘n wêreldskaal aanbied en versprei vir finansiële gewin.
Moodley, ‘n 25-jarige webontwerper, is op 23 Januarie in hegtenis geneem. Sy staan tereg op aanklagte van die besit van kinderpornografie en geldwassery.
Wilken en Moodley moet weer op 3 Februarie in die hof verskyn.
