Die Valke in Noordwes Provinsie, in samewerking met die Provinsiale Dwelmtaakspan en Lichtenburg K9-eenheid, het twee mense in Lichtenburg in hegtenis geneem vir die onwettige besit van dwelms en handel in dwelms.
Woordvoerder van die Valke in die provinsie Tinyiko Mathebula sê ‘n geheime operasie is uitgevoer nadat hulle inligting ontvang het dat ‘n man dwelms in die gebied verkoop.
Die twee is in hegtenis geneem nadat hulle dwelms ter waarde van R40 000 verkoop het.
“Beslag is gelê op 649 mandrax-tablette, 40 pakkies crystal meth en deursigtige plastiek wat CAT-middels bevat. ’n Soektog is by die Nigeriese man se huis gedoen waar beslag gelê is op crystal meth met ’n geraamde straatwaarde van R15 000 en CAT-dwelms ter waarde van R6 000. Toe die polisie besig was om die verdagtes te verwerk, het ‘n vrou, na bewering die Nigeriese man se meisie, probeer om die polisie om te koop om sy vrylating te verseker. Sy is daarna in hegtenis geneem en van korrupsie aangekla.”
