Die ooreenkoms bring ondersoeke deur die departement van justisie en die NVG na McKinsey Suid-Afrika se werk vir staatsbeheerde ondernemings Eskom en Transnet van 2012 tot 2016 tot ‘n einde.
Die Nasionale Vervolgingsgesag (NVG) het pas R1,1 miljard van die multinasionale maatskappy McKinsey en sy filiaal, McKinsey Suid-Afrika, teruggekry deur ‘n korporatiewe alternatiewe geskilbeslegtingsproses.
Die resolusie is die produk van internasionale samewerking tussen die NVG en die Verenigde State se departement van justisie, en is gekoördineer met Amerikaanse strafregprosesse wat gelei het tot ‘n skikkingsooreenkoms wat op Donderdag, 5 Desember 2024, deur ‘n Amerikaanse federale hof bevestig is.
“Dit is deel van ‘n baie doelbewuste NVG-strategie. Ons het die bykomende voordeel om ‘n vooruitbetaling van meer as R1 miljard aan strafvergoeding te kry wat gebruik kan word om die kapasiteit van die regstelsel te verbeter,” het Batohi gesê.
Batohi het opgemerk dat die impak van resolusies soos hierdie een, wat daarop gewys het dat sowat R2,2 miljard uit die Kriminele Bateherwinningsrekening, hoofsaaklik uit die ABB Bpk-resolusie, aangewend is om die regering se reaksie te finansier om onwettige mynbou aan te spreek.
“Die NVG bly nie net daartoe verbind om misdadigers te vervolg nie, maar ook om by te dra tot die ekonomiese herstel van die land deur middel van restitusie. Korporatiewe alternatiewe geskilbeslegtings spreek albei hierdie mandate van die NVG op ‘n koste-effektiewe, impakvolle manier aan. Sulke resolusies is ‘n wêreldwyd erkende en bewese misdaadbekampingsmetode. Hierdie strategie moet aanvaar word namate Suid-Afrika herstel van die gevolge van staatskaping.”
McKinsey het ‘n uitgebreide ondersoek gedoen het na die korrupte optrede van ‘n voormalige vennoot, Vikas Sagar, “wat sy onwettige optrede vir die maatskappy en sy kollegas versteek het en toe probeer het om sy gedrag toe te smeer”.
As gevolg van Sagar se korrupte optrede is kontrakte met Transnet en Eskom aan McKinsey toegeken ten bedrae van nagenoeg R2 miljard.
Alhoewel die maatskappy sy diens meer as sewe jaar gelede beëindig het, en in 2018 in die openbaar om verskoning gevra het, en gekies het om verantwoordbare stappe te neem, insluitend verantwoordelikheid vir Sagar se gedrag, het dit ‘n “zero tolerance”-beleid herhaal vir werknemers wat nie streng by die maatskappy se voldoeningsbeleide, prosedures en professionele standaarde hou nie.
“Ons aansienlike remediëringspogings en belegging in ons risikobeheerfunksies en -prosesse, uitgebreide ondersoek, volle samewerking met die owerhede in die Verenigde State en Suid-Afrika, en volle terugbetaling van die fooie aan die staatsondernemings jare gelede het gelei tot die volle resolusie van hierdie sake. McKinsey sal voortgaan om met owerhede in beide Suid-Afrika en die Verenigde State saam te werk in hul voortgesette ondersoeke,” het die internasionale maatskappy gesê.
McKinsey Suid-Afrika het gesê hy verwelkom die oplossing van hierdie sake en die afsluiting van hierdie betreurenswaardige situasie.
Suid-Afrika sluit aan by ‘n groeiende lys lande wat alternatiewe geskilbeslegtingsmeganismes gebruik om buitelandse omkopery en korrupsie te bekamp. Dit sluit die Verenigde State, Verenigde Koninkryk, Duitsland, Frankryk, Brasilië, Kenia, Maleisië, Singapoer, Mexiko en Kanada in.
