Die Lyttelton-polisie het drie verdagtes in hegtenis geneem wat hulle as polisiebeamptes voorgedoen het. Hulle het probeer om ‘n man in Irene te beroof en een van hulle word met soortgelyke sake verbind.
Drie polisienabootsers, wat gister na bewering by ‘n poging tot roof naby die Roete 21-kantoorpark in Irene, Pretoria, betrokke was, is laat dieselfde middag deur die Lyttelton-polisie in hegtenis geneem.
Volgens polisiewoordvoerder Kaptein Johan van Dyk, was beamptes van die Lyttelton SAPD se geheime eenheid besig was om ‘n misdaadbrandpuntgebied te patrolleer toe hulle ‘n wit Toyota Corolla met drie mans binne gewaar het.
“Een van die verdagtes het ‘n persoon wat langs die pad gestaan het deursoek,” sê Van Dyk.
Hy voeg by dat beamptes die voorval vinnig geïdentifiseer het as ‘n moontlike roof aan die gang.
“In ’n taktiese reaksie het een beampte die polisievoertuig verlaat en die verdagtes genader.”
Van Dyk sê die polisie het die verdagtes, wat steeds probeer het om die slagoffer van geld en ‘n selfoon te beroof, vinnig omsingel.
Nadat die verdagtes beveilig is, het beamptes ‘n deeglike deursoeking van die voertuig gedoen terwyl hulle gewag het op rugsteun van bykomende SAPD-lede.
“’n Private sekuriteitsmaatskappy het ook op die toneel aangekom om met die operasie te help.”
Tydens die soektog het beamptes verskeie items ontdek, insluitend vals selfone, koeverte, kontant en die slagoffer se selfoon.
“Daar was verskeie selfone in die voertuig versteek wat die verdagtes nie kon verantwoord nie.”
Van Dyk voeg by dat voorlopige ondersoeke aan die lig gebring het dat minstens een van die verdagtes vooraf in die Lyttelton-omgewing in hegtenis geneem is vir ‘n soortgelyke misdaad.
“Speurdienste sal hierdie verdagtes verbind met ’n aantal soortgelyke sake wat onlangs aangemeld is.”
Die bestuur van die Lyttelton SAPD het dank uitgespreek teenoor die beamptes wat by die arrestasies betrokke was.
“Ons het lojale en toegewyde lede wat bereid is om hul lewens op die spel te plaas om joune te red.”
