Drie beleide bedreig die lewensbestaan van alle Suid-Afrikaners, sal groei en ontwikkeling laat wankel en sal verseker dat werkloosheid, misdaad en korrupsie floreer.
As die regering van nasionale eenheid (GNU) ‘n beter toekoms wil inlui, moet hy alles in sy vermoë doen om die komende dreigement van onteiening sonder vergoeding te beëindig, die implementering van Nasionale Gesondheidsversekering (NGV) en die Swart Ekonomiese Bemagtigingsbeleid te stop.
Onteiening sonder vergoeding sal die finale doodsklok vir Suid-Afrika se ekonomie wees. Private eiendomsreg en die versekering dat die regering nie net jou eiendom kan wegneem nie, is ‘n hoeksteen van die beskawing.
Hierdie wetsontwerp sal ‘n alreeds wankelmoedige regering, met korrupsie en kaderversorging wat hoogty vier, die mag gee om mense van hul eiendom te stroop en dit weg te neem onder die dekmantel van “regstelling”. Dit is die grondslag vir totalitêre staatsbesit van grond.
Daar is geen waarborg dat Suid-Afrika binnelandse- en buitelandse beleggings sal kan behou nie. Suid-Afrika word kort-kort verbind met die woorde “failed state” – hierdie sal die doodskoot wees.
Daar sal ‘n algehele erosie van vertroue in SA se ekonomie wees, en ons sal Zimbabwe se voorbeeld volg en tot die status van ‘n gebroke nasie gerelegeer word.
Die Wetsontwerp op Grondonteiening, wat wag op die president se handtekening om wet te word, is ‘n bedreiging vir voedselsekerheid, sê boere.
Menige boere het reeds hul produksie en toekomstige beplanning begin afskaal, want hierdie wetsontwerp hang soos ‘n swaard oor die vooruitgang van ons voedselsekuriteit en ons is afhanklik van ons boere.
Bennie van Zyl, hoofbestuurder van TLU SA, het gesê nadat die vereniging tevergeefs probeer het om die Wetsontwerp te laat hersien, het die vereniging onlangs ‘n veldtog genaamd Projek 10 000 van stapel gestuur wat daarop gemik is om Suid-Afrikaners te mobiliseer “om saam met ons te staan in die verdediging van ons eiendomsreg”.
“Die howe sal binnekort die voorste linie van hierdie stryd wees en jou ondersteuning is deurslaggewend,” het hy gesê.
“As ons nie nou optree nie, sal ons vermoë om ons regte te verdedig drasties verminder word.”
Die wetsontwerp bepaal hoe onteiening van die grond vir openbare doeleindes of in die openbare belang sal verloop.Dit is op 19 Maart vanjaar deur die Nasionale Raad van Provinsies goedgekeur.
“Die rede waarom ons die veldtog van stapel gestuur het, is omdat ons geen reaksie ontvang het op die insette wat ons deur die portefeuljekomitee gemaak het nie.”
“Elke individu wat by ons aansluit, versterk ons kollektiewe vermoë om hierdie ongekende bedreiging te weerstaan. Ons kan nie wag nie. Die tyd om op te tree is nou. Die sluise kan enige oomblik oopgaan en ons moet gereed wees om terug te veg.
“Sodra die president die wetsontwerp onderteken het, sàl mense hul eiendomme verloor en voedselsekerheid sàl op die spel wees,” het Van Zyl bygevoeg.
Van Zyl het gesê: “Ons vrees is dat die onteieningsdeel van die wet die land in ’n krisis sal plaas.
“Wat gaan gebeur as die EFF en die MK-party in die volgende verkiesing in ‘n koalisie is. Terwyl ons daardie wet het, sal hulle dit gebruik om die plase in private besit te nasionaliseer.
“Dit sal ernstige armoede en werkloosheid veroorsaak omdat ons gesien het hoe die regering nie die grond bestuur wat tydens die grondeiseproses geneem is nie. Ons probleem is dat onteiening dan binne die wet is.”
‘n Boer, wat gevra het om nie genoem te word nie, het gesê onteiening van grond is algemeen in die meeste lande, maar die probleem was wanneer dit sonder vergoeding plaasgevind het.
“Jy kan nie ’n grondwet hê wat private eiendomsreg waarborg en dan het die staat die reg om dit na goeddunke weg te neem nie. Daar is geen logika daaraan nie. Die uitwerking op boerdery en voedselsekerheid sal baie sleg wees.
Dr Theo de Jager, voorsitter van die Suider-Afrikaanse Agri-inisiatief en voormalige president van die Wêreldboere-organisasie, het gesê onteiening sonder vergoeding is ‘n bedreiging vir die landbousektor, wat boere onseker maak oor langtermynboerdery.
“Landbou is ’n besigheid en besighede moet wins maak en vir dit om te kan gebeur, het hulle beleggings nodig. Die boere wat veronderstel is om die produkte te plant wat na vyf jaar geoes moet word, kan dit nie doen nie omdat hulle nie weet wat gaan gebeur wanneer die wet op onteiening van grond sonder vergoeding in werking tree nie.”
“Die wetsontwerp is die mees verwoestende faktor in landbou-investering en ons moet dit so gou as moontlik laat beëindig. Wat in Zimbabwe gebeur, het gekom as gevolg van wette soos dié waarvan ons praat,” het De Jager gesê.
Christo van der Rheede, voormalige uitvoerende hoof van AgriSA, het gesê die ekonomiese risiko’s verbonde aan onteiening sonder vergoeding sluit risiko’s vir die ekonomie in in terme van welvaartskepping en die landbousektor in terme van voedselsekerheid.
“Te min geld word vir ontwikkelingslandbou beskikbaar gestel. Baie grondhervormingsprojekte het armoedevalle geword en baie min, indien enige, landbou-uitset word gelewer.
“Onteiening van grond sonder vergoeding sal by baie begunstigdes ’n dringende behoefte aan beginkapitaal en deurlopende finansiering laat.
“’n Gebrek aan befondsing en kennis van hoe om die befondsing wat hulle ontvang die beste te gebruik, was die grootste bydraer tot mislukte grondhervormingsprojekte.”
