Die staat het die sakeroof, die besit van vuurwapens en ammunisie aanklagte teen Yanga “Bara” Nyalara teruggetrek en hom vrygelaat.
Die man van Brown’s Farm was al meer as twee jaar agter tralies nadat hy in Julie 2022 in hegtenis geneem is ná die moord op 12 mense in Site B, Khayelitsha, in 2021.
Die polisie het hom met nog ses moordaanklagte geklap ná ‘n massamoord in Site C. Ná sy arrestasie het inwoners van Site C vir sy vrylating betoog en gesê hy beskerm hulle teen misdadigers.
In Augustus vanjaar is Nyalara op alle moordaanklagte vrygespreek.
Hy het Dinsdag in die Kaapstadse streekhof verskyn waar die staat die verdere aanklagte teen hom teruggetrek het.
Nyalara se prokureur, Phindile Vepile, het gesê: “Die saak het op 26 November in die streekhof in Kaapstad verskyn. Dit was op die rol vir verhoor. Die aanklaer het die hof ingelig dat die klaers in die aangeleentheid nie meer met die staat saamwerk nie en het meer tyd gevra om hulle te oorreed om saam te werk. Die hof het geweier om hulle meer tyd te gee aangesien die saak om dieselfde rede nie op 11 November kon voortgaan nie. Die staat het uiteindelik aanklagte teruggetrek.”
Nyalara het in sy beëdigde verklaring gesê dat hy die getuienis wat die staat teen hom gaan voorhou, sal betwis.
Hy het ook gesê hy sal onskuldig pleit.
Sy medebeskuldigdes, Thulani Rhatisa en Julius Ket, is onderskeidelik 11 en sewe jaar tronkstraf opgelê.
In sy beëdigde verklaring het Nyalara gesê: “Daar word beweer dat ‘n MTN-winkel, op die hoek van Riebeeckstraat en St George’s Mall, in Kaapstad, op 30 Junie 2016 met ‘n vuurwapen beroof is.
“Ek is dieselfde dag in hegtenis geneem, maar ‘n entjie weg van die misdaadtoneel. Daar is geen ooggetuieverklaring in die dossier wat eerstehands sê dat ek by die beweerde roof betrokke was nie.
“Ek was alleen toe ek gearresteer is. Ek is nie in besit van enige vuurwapen gevind nie, en ek is ook nie in besit gevind van enige items wat na bewering op die genoemde dag beroof is nie.
“Daar word deur die staat beweer dat ek deur aanraking-DNS met die toneel verbind word.
“Ek sal onskuldig pleit op hierdie aanklagte. Ek sal die integriteit van die beweerde DNS-bewyse oor die aangeleentheid by die verhoor op 11 November betwis.”
Hy het verduidelik toe hy in die Oos-Kaap vir ‘n transito-rooftog in hegtenis geneem is, was hy uit op borg vir die MTN-rooftog.
Adjudant-offisier Shaun Fortuin het 21 sake gelys waarmee Nyalara verbind is vanaf die ouderdom van 19 in 2011 tot 2022, toe hy in hegtenis geneem is vir die 18 aanklagte van moord en die besit van die onwettige besit van ‘n vuurwapen en ammunisie.
Nyalara is net een keer in 2014 skuldig bevind aan die onwettige besit van ‘n vuurwapen en ammunisie.
Hy staan ook in Khayelitsha tereg op ‘n aanklag van verkragting en ontvoering. Die saak dateer uit 2017 en hy is deur sy DNS verbind. Vir dié saak is hy op borgtog vrygelaat.
