Die 65-jarige is op 23 Julie 2023 op sy plaas in Summerslie vermoor.
Vyf mans wat skuldig bevind word aan die moord op die Vrystaatse boer Peterson Andrew, is gesamentlik tot 205 jaar tronkstraf gevonnis.
Die vyf beskuldigdes is ook skuldig bevind aan huisbraak, roof en ontvoering.
Kaptein Loraine Earle van die Suid-Afrikaanse Polisiediens (SAPD) het gesê die rowers het waardevolle items gesteel, insluitend skootrekenaars, kameras, ‘n selfoon en ‘n Toyota Urban Cruiser.
“Die slagoffer is toe in die kattebak van sy voertuig gedwing en na die Tseseng-gebied in Qwaqwa vervoer, waar hy tragies vermoor is.”
Earle het die vonnisse verduidelik en gesê elkeen van die beskuldigdes is tot drie jaar tronkstraf gevonnis vir huisbraak, twaalf jaar vir roof met verswarende omstandighede, ses jaar vir ontvoering en 20 jaar vir moord.
Provinsiale Kommissaris van die Polisie in die Vrystaat, luitenant-generaal Baile Motswenyane, het gesê hierdie saak beklemtoon die SAPD se verbintenis om te verseker dat diegene wat geweldsmisdade pleeg aanspreeklik gehou word vir hul dade.
“Die polisie bly onwrikbaar in hul missie om die veiligheid en sekuriteit van alle gemeenskappe te verseker.
“Ons bedank al die betrokke rolspelers vir hul onvermoeide werk en voorbeeldige leierskap deur hierdie ondersoek.”
