https://twitter.com/GautengHealth/status/1860272328040456472
Sommige pasiënte en personeel by die Steve Biko Akademiese Hospitaal in Pretoria is ontruim ná ‘n brand by die hospitaal in die vroeë oggendure. Geen beserings is aangemeld ná die brand, wat intussen geblus is nie.
Lindsay Mnguni by die Stad Tshwane-nooddienstedepartement beskryf die voorval.
“Brandbestryders het drie meganiese positiewe drukventilasie-eenhede gebruik om rook uit te stoot wat die intensiewesorgeenheid (ICU) op die 6de verdieping verswelg het, waar 20 volwasse pasiënte en 1 pediatriese pasiënt ontruim en na ICU’s in die ander sale van die hospitaal oorgeplaas is. Geen beserings is by dié voorval aangemeld nie.”
“By verdere ondersoek het die brandbestryders ontdek dat die ononderbroke kragstelsel (UPS) wat bestaan uit litium-ioon-batterye wat as ‘n rugsteunstelsel dien in die geval van ‘n kragonderbreking, in die aanlegkamer op die sewende verdieping aan die brand was. Een van die hospitaal se elektrisiëns het gekom en die kragtoevoer na hierdie batterye geïsoleer om verdere skade te voorkom,” het sy gesê.
“Geen beserings is aangemeld nie. Die brand is omstreeks 04:42 heeltemal geblus en die oorsaak is nog nie vasgestel nie,” het Mnguni gesê.
