Die Spesiale Ondersoekeenheid (SOE) het Donderdag ‘n soek- en beslagleggingsoperasie by die JB Marks Plaaslike Munisipaliteit (Potchefstroom) in Noordwes uitgevoer.
Die SOE het gesê die operasie is in samewerking met die Direktoraat vir Prioriteitsmisdaadondersoek (ook bekend as die Valke) en die SA Polisiediens (SAPD) gedoen.
Die soektog is uitgevoer om bewyse te soek wat kan help met ‘n ondersoek wat die konstruksie van die N12-vloedlynkanaal teiken.
“Die soek- en beslagleggingsoperasie is die SOE se laaste uitweg om toegang te verkry tot dokumente wat nodig is vir die ondersoek en die nodige dokumentasie vir sy ondersoek te bekom,” het Kaizer Kganyago, woordvoerder van die eenheid, gesê.
Die aanvanklike proklamasie is vroeg in Oktober gepubliseer en sedertdien het die eenheid verskeie pogings aangewend om die munisipaliteit te kontak in ‘n poging om vrywillig toegang tot die vereiste dokumente te verkry.
Hierdie pogings het volgens die SOE onbeantwoord gebly.
Die landdroshof in Potchefstroom het op Woensdag, 6 November, die lasbrief vir deursoeking en beslaglegging aan die SOE toegestaan.
“Hierdie gebrek aan samewerking het die SOE genoop om die hof se hulp te vra om ‘n lasbrief te verkry om pertinente dokumente en elektroniese toerusting te deursoek en daarop beslag te lê,” het Kganyago gesê.
Die SOE ondersoek bewerings van wanadministrasie en bedrog rakende die verkryging of die kontraktering van goedere, werke of dienste deur die Munisipaliteit rakende die bou van ‘n vloedlynkanaal langs die N12 provinsiale pad.
Dokumentasie en toestelle waarop beslag gelê is, sluit in:
Maatskappy registrasie dokumente waarop beslag gelê is:
– Betalingsrekords (fakture, aankoopbestellings en oorbetalingsadvies).
– Elektroniese toestelle, insluitend skootrekenaars, mobiele toestelle en eksterne bergingsmedia wat deur relevante amptenare en werknemers gebruik word.
– Enige geassosieerde elektroniese data, insluitend e-posse en wolkbergingsinligting wat aan spesifieke personeel gekoppel is.
