Die borgtogaansoek van ‘n boer in Limpopo wat daarvan beskuldig word dat hy twee vroue by ‘n varkplaas vermoor het, sal na verwagting Woensdag in die Mankweng-landdroshof aangehoor word.
Zachariah Olivier en sy twee werknemers, Rudolph De Wet en Willian Musora, het Maria Makgato en Lucia Ndlovu na bewering vermoor voordat hulle in Augustus hul liggame in ‘n varkhok by Onvervaght-plaas in Sebayeng buite Polokwane gestort het.
Hulle staan tereg op aanklagte van moord, poging tot moord en regsverydeling.
Die hooggeregshof in Polokwane het vroeër die landdros se bevel wat Olivier toegang tot sy polisieverklaring verleen, tersyde gestel.
Die borgtogaansoek is Woensdag terugverwys na die Mankweng-landdroshof vir ‘n ander landdros om aan te hoor.
“Daar is verskeie redes waarom die verklaring van ’n beskuldigde nodig is vir doeleindes van sy borgtogaansoek,” het die hooggeregshof beslis.
“In die onderhawige saak is toegang deur die aanklaer geweier op grond daarvan dat die polisie inligting moet opvolg wat in die verklaring verskaf word.
“Dit is nie gepas vir hierdie hof om enige uitspraak te maak met betrekking tot die behoorlikheid van die weiering deur die vervolging om die respondent toegang tot sy verklaring te gee nie,” het die hof gesê.
Tydens ‘n vorige hofverskyning het De Wet beweer hy is ná sy arrestasie deur die polisie aangerand en gemartel en die beamptes geïdentifiseer wat hom na bewering aangerand het.
Sy prokureur, Jodi Meyer, het aan die hof gesê hulle wil ‘n strafsaak teen die beamptes aanhangig maak.
