Paramedici is na die toneel van ‘n skietery gestuur, waar hulle twee individue met veelvuldige skietwonde ontdek het.
Die polisie ondersoek tans ’n dubbele moord wat op 30 Oktober in Wesselton plaasgevind het.
Ambulansdienste is na die toneel gestuur, waar twee mans met veelvuldige skietwonde met hul aankoms dood verklaar is.
Volgens kapt Carla Prinsloo, woordvoerder van die Ermelo-polisie, is geen verdagtes nog in hegtenis geneem nie.
“In hierdie stadium kan ons nie ‘n motief bevestig nie,” het Prinsloo gesê.
“Vroeë aanduidings dui daarop dat die individue moontlik geteiken is, maar dit is spekulatief aangesien die ondersoek nog in sy vroeë stadiums is. Soos ons meer inligting inwin, hoop ons om die omstandighede rondom die voorval op te klaar.”
Dié voorval volg op die skietery van ‘n 25-jarige man wat op Vrydag, 18 Oktober by ‘n motorwassery in Cwebezela, Wesselton, noodlottig gewond is.
Prinsloo het berig die slagoffer het saam met ‘n groep vriende by die plaaslike besigheid gesit toe hy deur twee mans gewapen met pistole genader is.
“Die verdagtes het skote op die man afgevuur en hom verskeie kere getref,” het Prinsloo gesê. Hy is op die toneel dood.
Die verdagtes het toe gevlug in ‘n VW Polo sonder registrasieplate, wat verder in die pad geparkeer was.
Die polisie doen ‘n beroep op enigiemand met inligting wat kan help met die motorwasmoordondersoek om sers. Immanuel Mkoko by 017 819 2321 of 082 373 8389 te kontak.
