Die vroue is as vermis aangemeld ná ‘n oënskynlike huisinval by hul plaas in Eikenhof. Hulle is glo drie dae later dood aangetref.
Die vroue is as vermis aangemeld ná ‘n oënskynlike huisinval by hul plaas in Eikenhof. Hulle is glo drie dae later dood aangetref.
Die polisie het bevestig ‘n man is in hegtenis geneem nadat hy in besit gevind is van items wat aan twee Johannesburg vroue behoort wat dood in ‘n ou mynskag gevind is.
Die man, wat by ‘n nabygeleë informele nedersetting in hegtenis geneem is, het Maandag in die Vereeniging-landdroshof verskyn en is in aanhouding.
Luitenant-kolonel Mavela Masondo, Gautengse polisiewoordvoerder, het aan The Citizen gesê nog drie mans is ingeneem vir ondervraging oor die saak van huisroof, ontvoering en diefstal van motorvoertuie.
’n Saak van moord is ook by De Deur-polisiestasie geopen en word ondersoek.
Ma en dogter, Cecilia Johanna Flemming (82) en Hester Flemming (52), is as vermis aangemeld ná die voorval wat vermoedelik tussen 22:00 Vrydag en 04:00 Saterdag op ‘n plaas in Caymenweg naby die Eye of Africa-landgoed plaasgevind het.
Die private ondersoeker Mike Bolhuis het die eerste keer die nuus bekend gemaak dat die twee Maandag dood gevind is in ‘n oopgroefmyn in Eikenhof.
Bolhuis het gesê dat “elke leidraad gevolg is, met ontelbare ure wat aan die saak gewy is”, totdat die lyke ontdek is.
“Sedert die voorval op Saterdag, 26 Oktober 2024 aangemeld is, het talle spanne van Saps, SSS, Nasionale Misdaadagentskap (NCA), gemeenskapsforums, gemeenskapspolisiëringsforums (GPF’s) van omliggende gebiede, Johannesburg Metropolitaanse Polisiedepartement (JMPD), sekuriteitsmaatskappye , familie, vriende en gemeenskapslede het onvermoeid gewerk om na die slagoffers te soek,” het hy op sy private ondersoekwebwerf, Specialized Security Services (SSS) geskryf.
“SSS betuig ons innige meegevoel en gebede aan hul familie en vriende gedurende hierdie moeilike tyd.”
Bolhuis het verduidelik die huis is geplunder en twee voertuie is na bewering gesteel.
Hy sê een van die voertuie is Saterdag by ‘n motorwassery in Thokoza gevind. Die tweede voertuig, ‘n metaalgroen Isuzu-dubbelkajuit-LDV, registrasie CB01WRGP, word steeds vermis.
“Ons vermoed die twee vroue is deur die indringers gevat. Geen losprys-eise of ander kommunikasie is tans deur die indringers of die slagoffers gemaak nie,” het Bolhuis Sondag gesê.
Na wat verneem word, het die twee vroue alleen by die woning gebly toe die aanval plaasgevind het. Die private ondersoeker Antoinette Coetser, wat deur die familie gehuur is om die vroue op te spoor, het gesê verskeie spanne het na die twee gesoek.
“Die plaas is ver van omliggende eiendomme, so die bure kon niks gehoor of gesien het nie, wat dit moeilik maak,” het Coetser gesê.
Dit was nog onduidelik hoeveel verdagtes betrokke was.
