Tshwane Metropolisie het ‘n man gered wat in die kattebak van sy gekaapte motor in Winterveldt gevind is. Die verdagtes het van die toneel gevlug toe die beamptes opgedaag het.
Die Tshwane-metropolisiedepartement (TMPD) het die naweek in Winterveldt kapers afgeskrik wat ‘n voertuig met die bestuurder in die kattebak stroop.
Senior Superintendent Isaac Mahamba, TMPD-woordvoerder, het inwoners gewaarsku om te vermy om motors op sosiale media te koop, veral in die Winterveldt-omgewing.
Mahamba het gewaarsku dat misdadigers sosialemediaplatforms gebruik om mense te lok en te beroof.
“TMPD se taakspanlede in streek 1 sektor 1 het ’n gekaapte voertuig teruggekry ná ’n klag oor ’n VW-voertuig wat in die Klipgat-omgewing gekaap is.
“Die taakspanlede het die voertuig verlate in Winterveldt opgespoor en die bestuurder is in die kattebak van die motor gevind,” het hy gesê.
Mahamba het gesê die bestuurder het aan die beamptes gesê dat hy en sy vriend op pad was om na ‘n voertuig te gaan kyk wat aanlyn geadverteer is net om in ‘n lokval te trap.
“Hulle is aanwysings gegee deur die mense wat die voertuig verkoop het, net om te vind dat dit ‘n lokval was. Terwyl hulle aanwysings gekry het, het hulle drie mans met vuurwapens sien naderkom.
“Die passasier het ontsnap, maar die bestuurder is in die kattebak gesit en hulle het Winterveldt toe gery waar hulle die voertuig begin plunder het terwyl hy nog in die kattebak was.”
Die verdagtes het gevlug toe hulle die TMPD sien nader kom.
Ao Johan van Dyk, woordvoerder van die Pretoria-streekpolisie, het gesê die Tshwane-polisie het die naweek honderde verdagtes aangekeer.
“Voertuie is deursoek om seker te maak dat dit nie gesteel is nie en 21 geïdentifiseerde persele is deursoek. Dit het gelei tot 25 arrestasies vir dronkbestuur en vyf arrestasies vir openbare drinkery.
“Vyf mense is in hegtenis geneem vir die besit van en handel in dwelms toe vier inkopiesakke vol dagga en 51 plastieksakke met kristal meth in hul besit gevind is.”
“Tweehonderd sewe-en-vyftig individue is in hegtenis geneem vir misdrywe wat aanranding, huisbraak, openbare drinkery, bestuur onder die invloed en gewapende roof gedurende die naweek ingesluit het,” het hy gesê.
Van Dyk het gesê Operasie Shanela onder leiding van generaal-majoor Samuel Thine Saterdag in Mabopane het gelei tot die inhegtenisneming van 304 verdagtes. Tshwane-speurders het gehelp om 238 verdagtes wat by ernstige misdade betrokke was, in hegtenis te neem.
