Die verkryging sal waarde oor die Maputo-korridor skep
Grindrod Mauritius beoog om die oorblywende 35% belang in die aandelekapitaal van Terminal de Carvão da Matola Limitada (TCM) in die Maputo-hawe te verkry, het die groep Woensdag op Sens aangekondig.
Die koopsom vir die verkryging is $77 miljoen (ongeveer R1,4 miljard) en dit sal binne die volgende 12 maande afgehandel word, onderhewig aan sekere voorwaardes.
Grindrod se aandeelprys het vroegoggend met 1,86% tot R14,81 gedaal.
Grindrod Mauritius is ‘n volfiliaal van die JSE-genoteerde Grindrod Beperk – ‘n logistieke groep met sy hoofkwartier in Durban. Die groep is deel van ‘n konsortium met DP World wat terminale by die Mosambiekse hawe bedryf.
Dit besit tans 65% van TCM – ‘n private maatskappy met sy hoofkwartier in Maputo.
TCM besit ‘n droë massa-terminaal in Maputo wat die jaarlikse kapasiteit het om meer as 7 miljoen ton van hoofsaaklik magnetiet en steenkool uit te voer.
TCM word bedryf onder ‘n subkonsessie tot die Maputo Port Development Company se hoofhawekonsessie en kan vrag per spoor en pad ontvang.
Rasionaal vir die transaksie
Grindrod sê die langtermyn-subkonsessie van TCM is ‘n strategiese bate, wat die groep in staat sal stel om kostedoeltreffende en doeltreffende geïntegreerde logistieke oplossings vir sy klante se vragvloei te verskaf.
“Deur hierdie bate sal Grindrod sy waardeskepping oor die Maputo-korridor ontsluit en sy put-tot-hawe-oplossing sinvol vir sy kliënte dryf.”
Die transaksie is onderhewig aan voorwaardes, insluitend goedkeuring van mededingingsowerhede, TCM se gesertifiseerde resolusies vir Mosambiek, ‘n bindende belastingbeslissing van die Mosambiekse Belastingowerheid wat geen kapitaalwinsbelasting bevestig nie, en ‘n nuwe deurvloeiooreenkoms tussen TCM en sy geaffilieerde Vitol Coal South Africa.
Die deurvloeiooreenkoms is vir die duur van tot nege jaar en ‘n aanvanklike kapasiteitstoekenning van 2,25 miljoen ton per jaar en sal die huidige deurvloeiooreenkoms vervang.
