Die Valke in Noordwes het die voormalige finansiële hoof van die Ditsobotla plaaslike munisipaliteit in hegtenis geneem op aanklagte van bedrog van altesaam R460 000.
Radikashu Tsie se arrestasie volg op ‘n ondersoek na bewerings van bedrog met die verkryging van regspraktisyndienste vir Ditsobotla Plaaslike Munisipaliteit.
Hy het Woensdag vlugtig voor die Lichtenburg-landdroshof verskyn en is op borgtog van R5 000 vrygelaat.
Tinyiko Mathebula, woordvoerder van die Valke in die provinsie, het gesê Tsie word in Oktober weer in die hof verwag.
“Ondersoek het aan die lig gebring dat Tsie en sy medebeskuldigde Thouret Mampe Thabe Tiro, die direkteur van Tiro Prokureurs (PTY) LTD en Tsietsi Isaac Shema, die voormalige waarnemende direkteur van Korporatiewe Dienste by die Ditsobotla Plaaslike Munisipaliteit, saamgesweer het om die munisipaliteit van meer as R460 000 vir dienste wat nooit gelewer is nie, is verlede week in hegtenis geneem.
“Dit is tydens die ondersoek aan die lig gebring dat Tiro-prokureurs fakture by die munisipaliteit ingedien het vir regsdienste wat hy beweer het hulle gelewer het. Tsie en Shema het glo betaling goedgekeur vir dienste wat nooit gelewer is nie. Die trio staan tereg op vier aanklagte van bedrog en ‘n alternatiewe diefstalklag .”
Tiro en Shema is elk R8 000 borgtog toegestaan.
