’n 38-jarige man in Kaapstad het positief getoets vir mpox. Owerhede moniteer die situasie en doen kontakopsporing.
Die departement van gesondheid doen ‘n beroep op Suid-Afrikaners om waaksaam te wees aangesien die land nog een laboratorium-bevestigde mpox-geval aanteken.
Die departement het gesê die pasiënt is ‘n 38-jarige man wat op 4 September na ‘n privaat mediese praktyk in Kaapstad gegaan het om mediese hulp te soek.
Dit kom nadat hy tipiese mpox-letsels op die gesig, romp, borskas en geslagsdele, ‘n hoofpyn, ligsensitiwiteit, ‘n seer keel en spierpyn ervaar het.
Die man is nie in die hospitaal opgeneem nie. Gevolglik is die Wes-Kaapse uitbraakreaksiespan geaktiveer, en kontakopsporing en monitering-aktiwiteite is aan die gang.
Die nuwe bevestigde geval bring die totale aantal positiewe gevalle wat sedert die uitbreek in Mei vanjaar in die land aangeteken is, op 25 gevalle te staan, insluitend drie sterftes.
Twaalf van hierdie gevalle is in Gauteng aangemeld, 11 in KwaZulu-Natal, en nou twee in die Wes-Kaap.
Die departement het gesê die pasiënt is tuis en isoleer en hy is in ‘n stabiele toestand.
Die gesondheidsdepartement het bygevoeg: “Ons doen ‘n beroep op al die geïdentifiseerde en vermeende kontakte om met gesondheidsbeamptes saam te werk tydens kontakopsporing vir sifting en moontlike diagnose om verdere oordrag van hierdie voorkombare en behandelbare siekte te voorkom.”
“Die gesondheidsorgwerkers verstaan die belangrikheid van vertroulikheid in die bestuur van aangemelde en vermoedelike gevalle van aanmeldbare mediese toestande.”
Dit kom omdat mpox op 13 Augustus deur Africa Centres for Disease Control and Prevention (Africa CDC) tot ‘n openbare gesondheidsnood van kontinentale veiligheid verklaar is en op 14 Augustus 2024 deur die Wêreldgesondheidsorganisasie (WGO) ‘n openbare gesondheidsnood van internasionale kommer.
Die Afrika CDC en die WGO het Vrydag ‘n gesamentlike kontinentale reaksieplan vir Afrika bekendgestel om lande se pogings te ondersteun om die verspreiding van die virus te bekamp en lewens te red en te beskerm.
Die Mpox Strategiese paraatheid en reaksieplan sluit maatreëls in om toesig, laboratoriumopsporing, gevallebestuur, infeksievoorkoming en -beheer (IPC), inenting, risikokommunikasie en gemeenskapsbetrokkenheid (RCCE) en navorsing en innovasie te versterk.
“Dit is ‘n belangrike mylpaal vir ‘n gekoördineerde aksie tussen ons agentskappe om lande te ondersteun deur kundigheid te versterk en hulpbronne en vermoëns te mobiliseer om die verspreiding van mpox vinnig en doeltreffend te stuit,” het dr Matshidiso Moeti, WGO se streeksdirekteur vir Afrika, gesê.
“Deur saam te kom, kan ons meer bereik, en ons kollektiewe krag sal ons verder voer om te verseker dat gemeenskappe en individue beskerm word teen die bedreiging van hierdie virus.”
Intussen het die departement van gesondheid gesê die risiko van groter oordrag bly laag in die land, maar enigiemand kan mpox opdoen ongeag ouderdom, geslag, seksuele oriëntasie en ras.
Die algemene simptome sluit in ‘n uitslag wat vir twee tot vier weke kan duur, koors, hoofpyn, spierpyn, rugpyn, lae energie en geswelde kliere (limfknope).
Die pynlike uitslag lyk soos blase of sere en kan die gesig, handpalms, voetsole en die lies affekteer, maar die moontlike pasiënt word aangemoedig om tuis te isoleer terwyl hy vir toetsuitslae wag.
“Die resultate het op Vrydag, 6 September positief teruggekom. Luidens ’n ondersoekverslag het die pasiënt geen onlangse internasionale reisgeskiedenis of kontak met ’n vermeende of bevestigde mpox-geval nie,” het die departement Maandag in ’n verklaring gesê.
