Die handel in vervalste goedere kom neer op ekonomiese sabotasie.
Terwyl die Springbok-kaptein, Siya Kolisi, ondersteuners geprys het vir hul ondersteuning ná ‘n volmaakte oorwinning oor die All Blacks, is die opgewondenheid getemper deur die konfiskering van vervalste Springbok-goedere ter waarde van duisende rande.
Voortgesette pogings om die onwettige handel in vervalste goedere te bekamp, is beloon toe daar Saterdag tydens ‘n geïntegreerde operasie naby die Kaapstad-stadion in Groenpunt op die nagemaakte klere beslag gelê is.
Valse Springbok-goedere
Ao. Joseph Swartbooi, polisiewoordvoerder, sê die operasie, waarby SAPD-lede, wetstoepassers en handelsmerkbeskermers van verskeie hoë-end produkte betrokke was, het begin met voldoeningsinspeksies by stalletjies rondom die stadion.
“Tydens die operasie het die lede beslag gelê op verskeie vervalste goedere, nabootsings van bekende sporthandelsmerke, wat gelei het tot die uitreiking van boetes vir onwettige informele handeldryf sonder ’n geldige permit.”
Die provinsiale kommissaris van die Wes-Kaapse polisie, luitenant-generaal TheMbisile Patekile, wat die handel in vervalste goedere as ekonomiese sabotasie bestempel het, het sy dank uitgespreek vir die suksesvolle verwydering van vervalste produkte uit die strate van die Wes-Kaap.
“Hierdie ingrypings moet as afskrikmiddel en streng waarskuwing dien vir diegene wat handel dryf in vervalste goedere.”
Die polisie het verlede week beslag gelê op vervalste goedere ter waarde van meer as R94 miljoen en vyf buitelandse burgers in verskillende dele van die land in minder as drie weke in hegtenis geneem.
Die Suid-Afrikaanse Polisiediens (SAPD) was meedoënloos in sy pogings om die onwettige handel in vervalste en smokkelgoedere landwyd te ontwrig en af te breek.
Die klopjagte is uitgevoer deur die SAPD en verskeie wetstoepassingsagentskappe, insluitend die Valke, die departement van binnelandse sake, die Suid-Afrikaanse Inkomstediens (Saps), handelsmerkbeskermers en private sekuriteitsmaatskappye.
Polisiewoordvoerder, luitenant-kolonel Amanda van Wyk, het gesê hulle sal voortgaan om die onwettige handel in vervalste goedere te bekamp, “om wettige besighede en verbruikers te beskerm wat aan substandaardprodukte onderwerp word wat gesondheids- en veiligheidsrisiko’s inhou.”
