Eben Stoltz, ‘n insleepvragmotorbestuurder by Ermelo Insleepdienste, het ternouernood aan die dood ontkom na ‘n gewelddadige aanval terwyl hy ‘n kliënt by Suncity Ext 32, ‘n gedeelte van Acasia op die N2-pad na Piet Retief, bygestaan het.
Stoltz is Maandag omstreeks middernag na ‘n toneel gestuur waar ‘n onklaar voertuig was en het met sy aankoms met die kliënt en sy kennis geskakel.
Nadat die voertuig beveilig was vir insleep, het drie mans verskyn en die kliënt genader. Die situasie het vinnig ontaard in ‘n gewelddadige onderonsie en die mans het die kliënt en sy kennis begin aanrand.
Toe die kliënt en sy kennis gevlug het, het die aanvallers op die insleepwa geklim, deur die motor gevroetel en na bewering die kliënt se beursie gesteel.
Hulle het toe hul visier na Stoltz verskuif en sy waardevolle besittings geëis.
“Hulle het my uit my voertuig getrek en my begin slaan,” het Stoltz onthou.
“Ek het ’n skerp pyn in my rug gevoel en besef ek is gesteek.”
Die meslem het sy linkerlong deurgesteek en binne-in sy liggaam afgebreek. Dit het sy hart met 3 cm gemis, het hy later by mediese personeel verneem. Beseer en bebloed het hy daarin geslaag om te ontsnap en langs die pad ineengestort.
Ten spyte van sy pogings om verbygaande voertuie te vlag, het baie hom geïgnoreer en eenvoudig verby gery terwyl hy hulpeloos gelê het en uitgebloei het.
“Ek het probeer om vir voertuie te waai, maar mense het my waarskynlik as ‘n dwelmverslaafde of ‘n dronkaard beskou,” het hy gesê.
