’n Ontploffing by ’n Sasol-gaspypleiding naby die SAPD Opleidingsakademie in Pretoria het gelei tot die ontruiming van meer as 2 500 polisieleerlinge en -beamptes.
Woensdagoggend is meer as 2 500 polisieleerlinge, saam met beamptes van gespesialiseerde eenhede, insluitend die Nasionale Gesamentlike Operasionele en Intelligensiestruktuur (NatJoints), uit die Suid-Afrikaanse Polisiediens (SAPD) Opleidingsakademie in Tshwane ontruim ná ‘n gaspyplyn-ontploffing by ‘n nabygeleë besigheidsperseel.
Die ontploffing het ‘n brand naby een van die akademie se ingange laat ontstaan, wat die ontruiming aangespoor het.
Fannie Masemola, nasionale polisiekommissaris, het gesê die veiligheid van polisieleerlinge en -lede is ‘n prioriteit en die ontruiming is ‘n voorsorgmaatreël.
“Die besluit om die leerlinge, SAPD-opleiers en lede van verskeie gespesialiseerde eenhede insluitend die Natjoints Coordination Centre (NCC) te ontruim, is geneem na aanleiding van advies en konsultasie van kundiges.
“Verskeie kundiges is op die perseel om die brand by die aangrensende sakeperseel te bedwing. Daar moet kennis geneem word dat die opleidingsakademie nie geraak word nie en dat die ontruimingsproses ’n voorsorgmaatreël deur die bestuur is.”
’n operasionele sentrum, gelei deur die adjunk nasionale kommissaris van polisiëring, Tebello Mosikili, is gestig om die situasie te bestuur. Teen Woensdagmiddag het die brand uitgebrand.
Die woordvoerder van Tshwane-nooddienste, Lindsay Zwelithini Mnguni, het gesê hulle het om 11:48 ‘n oproep ontvang en eenhede gestuur om ondersoek in te stel.
“Ons het ‘n oproep van ‘n brand ontvang, dit is nie aan ons as ‘n ontploffing aangemeld nie. Met sy aankoms het die distriksbevelvoerder toe beweer dit is ‘n pypleiding wat lek en brand en sy het gevra dat nog eenhede moet kom ondersteun,” het hy gesê.
Sasol, die gasverskaffer, het die kleppe in die gaspyp toegemaak.
“Die ondersoek sal binnekort begin en die terrein is geïsoleer net om veilig te wees, maar in hierdie stadium weet ons nog nie die oorsaak nie,” het Alex Anderson, Sasol-woordvoerder, gesê.
Mnguni het gesê, “Dit is aardgas, so as ons dit blus, sal ons dit nie kan monitor nie en dit gaan meer gevaar vir die mense hier rondom skep. Ons moes die vuur laat brand en Sasol het opgedaag om die kleppe af te skakel sodat daar nie meer toevoer na die pyp is nie.”
Mnguni sê geen beserings is aangemeld nie. ‘n Ontruimingsradius van 500 m is ingestel, en ‘n gesamentlike operasiebevel wat die polisie, nooddienste en ander belanghebbendes betrek het, het toesig gehou oor die situasie.
Hierdie voorval volg op ‘n soortgelyke ontploffing in Lilian Ngoyistraat (voorheen Breestraat) in Johannesburg in Julie 2023. ‘n Gasontploffing het aansienlike skade en ontwrigting in die gebied veroorsaak, wat kommer oor gasinfrastruktuurveiligheid en noodreaksie beklemtoon. DM
