Hy sal na verwagting Maandag, 19 Augustus 2024 in die Caledon-landdroshof verskyn.
’n 17-jarige verdagte is Vrydag in hegtenis geneem in verband met die dood van die 16-jarige Deveney Nel.
Hy sal na verwagting Maandag, 19 Augustus 2024 in die Caledon-landdroshof verskyn.
Nel, ‘n graad 10-leerling aan die Hoërskool Overberg in Caledon, Wes-Kaap, is verlede week in ‘n stoorkamer op die skoolterrein gevind.
Deurbraak
Brigadier Novela Potelwa, polisiewoordvoerder, sê die inhegtenisneming het plaasgevind ná ‘n uitgebreide ondersoek na Nel se dood deur speurders van ernstige en gewelddadige misdade.
“Ons sal geen hulpbronne ontsien om by die plegers van misdaad uit te kom nie. Geslagsgebaseerde geweld en vrouemoord is ‘n prioriteit vir die Suid-Afrikaanse Polisiediens. Daarom verwelkom ons hierdie arrestasie,” sê Lt-generaal Thembisile Patekile.
Nel word vermis
’n Gewone Woensdag het vroeër vandeesmaand in afgryse vir die Nel-gesin verander toe Deveney nie met haar gewone vervoer huistoe gekom het nadat die skool se netbal- en rugbyspanne klaar wedstryde teen Hoërskool Bredasdorp gespeel het nie.
Haar ma, Lida Nel het haar as vermis by Caledon-polisiestasie gaan aanmeld en is toe teruggestuur na die polisiestasie in Grabouw.
Die polisie het haar lyk op die skool se perseel gevind, wat gelei het tot die skool se sluiting Donderdag vir ondersoek. Ouers van die skool is verlede Woensdag omstreeks 23:00 oor haar tragiese dood ingelig.
Polisie ondersoek
Heinrich Wyngaard, Uitvoerende Voorsitter van die burgerlike organisasie Cape Forum het gesê hulle is bekommerd oor hoe die misdaadtoneel hanteer is.
Wyngaard het in ‘n brief een van die Forum se bekommernisse gelys aangesien ‘n senior offisier van die Overberg-distriksbeveleenheid blykbaar beheer oor die misdaadtoneel geneem het voordat die plaaslike polisie ondersoek kon instel, en blykbaar ondanks die teenwoordigheid van die plaaslike stasie-bevelvoerder.
Daar is ook in die brief gesê die beampte het na bewering die plaaslike ambulansdienste toegang tot die slagoffer geweier, wat ‘n vertraging veroorsaak het om die slagoffer dood te verklaar.
Polisie in Wes-Kaap se versekering
Anroux Marais, minister van polisie-oorsig en gemeenskapsveiligheid vir die Wes-Kaap, het die versekering aan die publiek gegee dat die ondersoek in die beste hande is. Sy het destyds gesê hulle kon nie by die inhoud van die ondersoek ingaan nie. Maar hulle het sterk leidrade opgevolg.
“Ek besef dat dit nie die maklikste ding is nie in die lig van die aaklige aard van die gebeure, die wye, eerlike en verstaanbare ontsteltenis in die gemeenskap en veral die familie, en die noodsaaklikheid van reg en geregtigheid.
“Dit is egter veral belangrik noudat die polisie die ruimte gegun word om hul werk te kan doen sodat die oortreder gevang en suksesvol vervolg kan word.”
Ekstra sekuriteit by die skool
Skoolhoof Johan Jacobs het bevestig dat die skool ekstra sekuriteit bygevoeg het.
Die departement het ook maatskaplike werkers en beraders vir leerlinge gereël.
“Ons was nog altyd ’n hegte gesin op skool, die Ovie-gesin wat uitstaan bo ander skole omdat ons vir mekaar omgee. So, in hierdie skokkende tyd, vra ek dat jy nie in vrees lewe nie.”
