’n Voormalige administratiewe klerk by die departement van binnelandse sake in Cleary Park, Oos-Kaap, is tot vyf jaar direkte gevangenisstraf gevonnis weens paspoortbedrog.
“Tony Stout het onwettig en opsetlik die identifikasiebesonderhede van Suid-Afrikaanse burgers gebruik om die foto’s vir buitelandse burgers te verander. Hy het op bedrieglike wyse Suid-Afrikaanse paspoorte aan hulle verskaf,” het ao Ndiphiwe Mhlakuvana, woordvoerder van die Valke, gesê.
Geen boete, geen vuurwapen nie
Stout se vonnisoplegging het gekom nadat hy op 26 Maart 2021 deur die Valke-beamptes in Port Elizabeth gearresteer is. Hy het op dieselfde dag van sy inhegtenisneming in die hof verskyn en is toe op borgtog van R500 vrygelaat.
Volgens Mhlakuvana het die vonnis geen opsie vir ‘n boete gehad nie en is hy onbevoeg verklaar om ‘n vuurwapen te besit.
“Stout het verskeie hofverskynings tot sy vonnisoplegging deur die Gqeberha New Law-hof op 8 Augustus 2024 gemaak in nege aanklagte van bedrog en nege aanklagte van oortreding van die identifikasiewet 68 van 1997,” het Mhlakuvana gesê.
Sindikaat het buitelandse burgers gehelp om SA paspoorte te kry
In ‘n afsonderlike voorval op 1 Augustus is Judy Zuma, voormalige amptenaar van binnelandse sake, deur die Durbanse handelsmisdaadhof tot 12 jaar gevangenisstraf gevonnis weens paspoortbedrog.
Die departement van binnelandse sake het gesê Zuma het tussen 28 Mei en 12 Junie 2021 192 paspoorte vervals. Dit was vir buitelandse burgers wat nie gekwalifiseer het om dit te hê nie. Sy is R4 000 vir elke paspoort betaal.
Sy is aanvanklik in ‘n “steekoperasie” in hegtenis geneem nadat sy probeer het om ‘n teenmis-daadbeampte van binnelandse sake met R10 000 om te koop.
“Al die geaffekteerde paspoorte is ge-rooivlag, wat beteken dat enigiemand wat probeer om hierdie bedrieglike dokumente by ‘n hawe van binnekoms te gebruik, onmiddellik gearresteer sal word,” het Siya Qoza, kommunikasiehoofdirekteur, gesê.
Twee buitelandse burgers is reeds weggesluit en dien tyd uit vir betrokkenheid by hierdie korrupte skema. Nog twee is vandag tot vier jaar gevangenisstraf gevonnis.
Daar word beweer dat Zuma in dié skema gewerf is deur ‘n ander voormalige amptenaar van binnelandse sake, Zima Shange, wat in Oktober 2023 tot ‘n effektiewe 10 jaar gevangenisstraf gevonnis is.
Leon Schreiber, minister van binnelandse sake, en adjunkminister Njabulo Nzuza het die arrestasie van Zuma verwelkom en ‘n duidelike boodskap uitstuur aan diegene wat aan sulke misdade deelneem, sal gearresteer word.
“Ek is afgestoot deur die optrede van Zuma en ander lede van sulke sindikate, wat ons dokumente goedkoop maak, ons veiligheid bedreig en die werk wat deur toegewyde amptenare van binnelandse sake gedoen word ondermyn,” het Schreiber gesê.
“Hierdie is ‘n oproep aan ander mense wat hierby betrokke is dat jy dalk dink jy kom daarmee weg, Ons sal jou beslis kry. Ons sal seker maak jy ly die gevolge net soos Zuma,” het Nzuza gesê.
