Saterdagmiddag was besig vir Pretoria se Nooddienste-afdeling aangesien dit twee brande moes hanteer.
’n Brand by ’n skrootwerf in Pretoria het daartoe gelei dat meer as ’n dosyn motors Saterdagmiddag vernietig is.
Die stad Pretoria se departement van nooddienste het gesê die brand het omstreeks 15:00 by ‘n buitegebou in Maliestraat, Booysens, uitgebreek.
“Die noodoproepsentrum het onmiddellik ‘n grasbrand-eenheid en ‘n vinnige intervensie-eenheid vanaf Philip Nel Park-brandweerstasie na die toneel gestuur. Verskeie bykomende brandbestrydingshulpbronne van verskeie stasies, insluitend Atteridgeville-, Bosman-, Innesdale-, Heuweloord- en Centurion-brandweerstasies, is as rugsteun na die toneel gestuur,” lui die verklaring.
Die hulpbronne het twee brandweerwaens, ‘n watertenkwa en ‘n eenheid van die distriksbevelvoerder ingesluit.
“By aankoms het brandbestryders gevind dat verskeie voertuie in ‘n skrootwerf aan die brand was. Hulle het dadelik met brandbestrydingsoperasies begin en gekeer dat die brand na ’n nabygeleë fabriek versprei.
“Die brand is omstreeks 16:34 geblus.”
Geen beserings is aangemeld nie.
Die oorsaak van die brand is nog nie vasgestel nie.
Matrasse aan die brand buite fabriek
Dit was ‘n besige dag vir Pretoria se Nooddienste-afdeling.
Die Rosslyn-brandweerstasie het ook Saterdagmiddag ‘n brand by ‘n fabriek in Henniestraat hanteer.
Charles Mabaso, woordvoerder van Tshwane EMS, het gesê brandbestryders het opgedaag om skuimmatrasse en twee staalhouers buite die fabriek aan die brand te vind. Brandbestryders moes ook vlamme in dele van die fabriek blus.
Brandbestrydingshulpbronne van ander stasies is as rugsteun na die toneel ontbied, het hy gesê.
Dit het vier brandweerwaens, twee watertenkwaens en twee skuimtenders ingesluit.
