’n Voormalige projekbestuurder van die Stad Johannesburg is tot sewe jaar gevangenisstraf gevonnis nadat hy skuldig bevind is aan diefstal van diesel van R1 miljoen.
Sipho Machuene Dikhoba (50) is vandeesweek in die Johannesburgse Gespesialiseerde Handelsmisdaadhof in Palmridge gevonnis, het die Nasionale Vervolgingsgesag (NVG) bevestig.
Phindi Mjonondwane, Gautengse NVG-woordvoerder, het gesê die saak behels diefstal van diesel van meer as R1 miljoen tussen die tydperk van Augustus 2019 en Oktober 2020.
Mjonondwane het gesê die departement van maatskaplike ontwikkeling se finansiële departement het oor ‘n jaar onreëlmatighede in dieselfakture geïdentifiseer.
Die saak is na die Direktoraat vir Prioriteitsmisdaadondersoek (bekend as die Valke) verwys.
“Verdere ondersoek het verskeie daaglikse dieselaankope aan die lig gebring en gevind dat die beoogde kragopwekkers nie funksioneel was nie.
“Toe hy gekonfronteer is met bewyse van sy betrokkenheid by hierdie bedrieglike aktiwiteite, het die beskuldigde bedank as die projekbestuurder by die Stad Johannesburg.”
Die NVG het gesê Dikhoba het skuld beken op 224 aanklagte van diefstal.
“Hy het ook met die staat saamgewerk deur teen sy medepligtige, wat tans teregstaan, te getuig.”
Die NVG het tydens slotbetoë gesê senior staatsadvokaat, Valencia Dube, het aan die hof gesê die diesel wat deur die beskuldigde gesteel is, was bedoel om kragopwekkers aan te dryf wat elektrisiteit aan kwesbare huishoudings onder die sorg van die departement van maatskaplike ontwikkeling (DSD) verskaf.
“Die hof het ook gesê dat die beskuldigde se opgang van ‘n skoonmaker van die Stad Johannesburg tot bestuurder ongedaan gemaak is deur hebsug, wat die erns van sy oneerlikheid in ‘n vertrouensposisie beklemtoon het.”
Mjonondwane het die vonnis verduidelik en gesê die hof het vyf jaar opgeskort vanaf die vonnis van sewe jaar, op voorwaarde dat Dikhoba sy pensioenfonds gebruik om ‘n bedrag van meer as R500 000 terug te betaal aan die werkgewer, wat die klaer in die saak is.
IOL Nuus
