Die sage oor die Mej SA-deelnemer Chidimma Adetshina se nasionaliteit het Woensdag weer ‘n draai gemaak nadat die departement van binnelandse sake bevind het dat die persoon wat as haar ma aangeteken is, moontlik bedrog gepleeg het.
In ‘n verklaring het die departement gesê hy het ontbloot dat prima facie redes bestaan om te glo dat bedrog en identiteitsdiefstal moontlik gepleeg is deur die persoon wat in Binnelandse Sake-rekords aangeteken is as Adetshina se ma; “Adetshina kon nie deelgeneem het aan die beweerde onwettige optrede van haar ma nie, aangesien sy ‘n baba was toe die aktiwiteite in 2001 plaasgevind het.
’n Onskuldige Suid-Afrikaanse ma wie se identiteit moontlik gesteel is as deel van die beweerde bedrog wat deur Adetshina se ma gepleeg is, het as gevolg daarvan gely omdat sy nie haar kind kon registreer nie,” het die departement gesê.
Dit kom nadat mej SA organiseerders die departement genader het met ‘n versoek om Adetshina se burgerskap te verifieer.
Dié versoek het volgens die departement vergesel van skriftelike toestemming van beide Adetshina en haar ma.
Meer hieroor
Binnelandse Sake verduidelik Mej SA deelnemer sage
By ontvangs van hierdie versoek het die departement gesê hy het elke hulpbron tot sy beskikking ontplooi om die waarheid vas te stel, insluitend die ondersoek van argiefnavorsing, besoeke aan hospitale en terreinbesoeke om inligting te verifieer.
“Die departement het sy ondersoek uitgebrei om enige amptenare betrokke by die beweerde bedrieglike skema te identifiseer en agtervolg, en is besig om regsadvies in te win oor die implikasies van die beweerde bedrieglike aktiwiteite op Adetshina se burgerskapstatus.
“Na afhandeling van die ondersoek beoog Binnelandse Sake om strafregtelike klagte teen alle geïmpliseerde partye aanhangig te maak. Daar is deurlopende verbintenisse met alle belanghebbendes, insluitend Adetshina se ma,” het die departement gesê.
Adetshina se pa was oënskynlik Nigeriër terwyl die 23-jarige se ma vermoedelik van Mosambiek was.
Haar nasionaliteit het gelei tot ‘n debat oor haar geskiktheid om aan die Mej Suid-Afrika-kompetisie deel te neem omdat haar pa Nigeriër is.
“Hierdie saak, wat spruit uit beweerde bedrieglike aktiwiteite wat 23 jaar gelede gepleeg is, beklemtoon die dringende behoefte aan die digitale modernisering van binnelandse sake-aansoeke, beregting en verifikasieprosesse, om die departement te isoleer teen bedrieglike inmenging, soortgelyk aan die hervormings wat by die Suid-Afrikaanse Inkomstediens in die laat 2000’s.
Die saak beklemtoon ook die rede vir die departement se blokkering van sekere duplikaat-ID’s, en dat die hofbevel deblokkering van hierdie dokumente met omsigtigheid hanteer moet word,” het die departement gesê.
“Deur hierdie proses word Binnelandse Sake gelei deur ons verbintenis tot die herstel en handhawing van die oppergesag van die reg sowel as die regte van alle partye.”
