Die aanklag van moord moes tot strafbare manslag afgegradeer word toe die staat nie in die hof kon bewys dat die oorledene vermoor is nie.
Armand Opperman is tot 27 jaar tronkstraf gevonnis vir die strafbare manslag en roof van die 62-jarige Lance Arthur Da Silva by die oorledene se plaas in Rouxville, Vrystaat.
Die Rouxville-landdroshof het Opperman (39) gevonnis vir die misdade 15 maande nadat dit plaasgevind het.
Verdagte vlug na Gqeberha
Da Silva is omstreeks 14:30 op 4 Mei verlede jaar met ‘n skietwond in die linkerslaap in die hoofslaapkamer op die plaas Windpoort gevind.
Opperman, wat na bewering saam met die oorledene op die plaas gewoon het, het op die vlug geslaan en is die volgende dag in Gqeberha gearresteer.
Hy het sy borgtogaansoek in die Rouxville-landdroshof laat vaar en het sedertdien in aanhouding gebly.
Staat kon nie moord bewys nie
Mahlomola Kareli van die kantoor van die Provinsiale Kommissaris van die Vrystaat het verduidelik dat die saak aan die span speurders van die provinsiale eenheid vir ernstige en geweldsmisdade, moord en roof oorhandig is.
In samewerking met die Nasionale Vervolgingsgesag (NVG) aanklaer het die staat die aanklag van moord teen Opperman gebring, maar dit is na strafbare manslag verander toe hulle nie kon bewys dat dit ‘n moord was nie.
Armand Opperman is gevonnis tot 10 jaar gevangenisstraf vir strafbare manslag en 14 jaar direkte gevangenisstraf vir roof met verswarende omstandighede, asook drie jaar vir die besit van ongelisensieerde vuurwapens en ammunisie.
Onlangse plaasaanvalle
Die Suid-Afrikaanse Polisiediens (SAPD) het middel Junie gereageer op minstens vyf gevalle van plaasaanvalle regoor die land in een week.
Die meeste van die slagoffers was bejaardes. Sommige is vermoor, terwyl ander aangeval en van hul besittings beroof is.
- In Limpopo is ‘n bejaarde egpaar van 79 en 85 jaar na bewering aangeval en hul vuurwapens is op ‘n plaas in die Tzaneen gesteel.
- In ‘n afsonderlike voorval is twee verdagtes in hegtenis geneem vir die aanval op ‘n 69-jarige man op sy plaas in Barkly-Oos, in die Oos-Kaap. Volgens kolonel Priscilla Naidu was die bejaarde slagoffer op pad na die kragopwekkerkamer wat sowat 15 meter van die huis af is toe hy deur ‘n onbekende persoon aangeval en in die nek gesteek is.
- Toe is ‘n bejaarde vrou op ‘n plaas buite Swartruggens in Noordwes vermoor. Haar 70-jarige man is by sy aankoms deur die verdagtes aangerand. Hulle het hom na die hoofhuis geneem, waar hulle huisraad geplunder en op twee bakkies gelaai het.
- In KwaZulu-Natal is die bekende boer Tollie Nel op sy plaas doodgeskiet, na bewering deur vyf klapmus-geklede verdagtes wat te voet met gesteelde vuurwapens ontsnap het.
