Die polisie het vinnig opgetree op inligting wat ontvang is oor die diefstal van Transnet-infrastruktuur en twee verdagtes betrap wat koperkabels van sowat 745 kg gesteel het.
TWEE verdagtes is in hegtenis geneem nadat hulle betrap is dat hulle Transnet-kabels ter waarde van ‘n halfmiljoen rand gesteel het.
Die arrestasie is onlangs gemaak tydens ‘n klopjag wat uitgevoer is deur eThekwini Economic Infrastructure-taakspanlede in die Bayhead-area, wat onder die Brighton Beach-polisiëringsgebied val.
Polisiewoordvoerder van eThekwini-distrikskaptein, Carmen Rhynes, sê die polisie het inligting ontvang oor die diefstal van Transnet-infrastruktuur en vinnig gereageer, wat daartoe gelei het dat twee verdagtes van 31 jaar op heterdaad betrap en onmiddellik in hegtenis geneem is.
“Albei verdagtes is aangekla vir peuter met noodsaaklike infrastruktuur en diefstal, asook vir die besit van en die ontvangs van eiendom wat redelikerwys vermoedelik gesteel is,” het Rhynes gesê.
Sowat 745 kg se gesteelde Transnet-kabels ter waarde van R500 000 is op die toneel teruggevind, asook twee voertuie en ‘n groot aantal kraggereedskap.
Albei verdagtes het op 2 Augustus in die Durban-landdroshof verskyn.
Die eThekwini-distrikskommissaris, generaal-majoor Makhosazana Victoria Kheswa, het gesê: “Die eThekwini Ekonomiese Infrastruktuur-taakspan is daartoe verbind om sulke oortreders in hegtenis te neem en te verseker dat hulle voor ‘n geregshof gebring word om vervolg te word. Die beskadiging en vernietiging van noodsaaklike infrastruktuur in eThekwini sal nie geduld word nie. Ek is baie tevrede met hierdie arrestasie en herstel.”
