EFF-leier sê die projek om die Parlement te herbou sal bespoedig word as SA na China uitreik.
Julius Malema, EFF-leier, sê SA moet sy “vriendskap” met China gebruik om hulp te kry met die herbou van die Parlement.
‘n Brand in Januarie 2022 het dele van die Nasionale Vergadering en die Ou Vergadering se vleuel in puin gelê. Twee jaar later moet bouwerk nog begin en sal na raming sowat R3 miljard kos.
Malema het Saterdag tydens ‘n EFF-verjaardagvieringsaamtrek in Kimberley, Noord-Kaap, gesê president Cyril Ramaphosa het slim stede en koeëltreine belowe, maar kon nie eers basiese dienste lewer nie.
Hy het voorspel dat die heropbou van die Parlement ‘n dekade sou neem onder die huidige regering.
“Dit het twee jaar geneem om rommel te verwyder, nie om te bou nie, maar om die rommel te verwyder. Dit sal ons 10 jaar neem om die Parlement te herbou as die ANC voortgaan”.
Hy het gesê die projek sal bespoedig word as SA na China uitreik.
“As jy nie die vermoë het om die parlement vinnig te bou nie, en jy het Chinese vriende, vra hulle om te help.
Hy het gesê China het sy kundigheid bewys toe hy “twee moderne hospitale tydens die Covid-19-pandemie” gebou het.
“Hoekom kan ons nie vir China sê nie; ‘Kom herbou hierdie Parlement maar jy moet saam met ons mense werk om vaardighede aan hulle oor te dra. Sodat wanneer jy die land verlaat ons mense bly met die kapasiteit om hul eie land te bou.”
Omphile Maotwe, EFF-LP, het vandeesweek gekla dat die Parlement “steeds nie ’n plan vir ’n tydelike struktuur het terwyl die herbouing plaasvind nie” en het gevra dat die wetgewer na Pretoria verskuif word.
“Ons doen steeds ’n beroep op die parlement om na Pretoria in die hoofstad te verhuis. Die wetgewende en uitvoerende huise moet in een stad wees, verkieslik Gauteng, wat baie meer toeganklik is vir die mense regoor die land as die Kaap.
Thoko Didiza, speaker van die Nasionale Vergadering, het voorgestel dat verrigtinge intussen na ‘n reuse tent skuif. Die voorgestelde markiestent is in 2013 in Qunu, Oos-Kaap, opgerig vir die gedenkseremonie van oudpresident Nelson Mandela.
Didiza het gesê samesprekings met die departement van openbare werke en infrastruktuur oor die plan is gevorder.
“Die minister het aangedui dat die koepel beskikbaar is en die departement en parlement sal weer Donderdag vergader om hierdie saak af te handel.
“Sou ons suksesvol word, sal hierdie tydelike stap baie help om te verseker dat die parlement sy sake doeltreffend onderneem,” het Didiza gesê.
