FORDSBURG – Die Nasionale Eenheid vir Vervalsing Goedere in samewerking met sy misdaadbekampingsvennote het vandeesweek ‘n winkelkompleks in Pinelaan in Fordsburg geteiken en beslag gelê op vervalste goedere ter waarde van meer as R8 miljoen en 18 verdagtes gearresteer.
Die polisie is op Donderdag, 18 Julie 2024 deur amptenare van die Suid-Afrikaanse Inkomstediens (SAID), Nasionale Reguleerder vir Verpligte Spesifikasies (NRCS), Handelsmerkbeskermers, Misdaadvoorkomingsbewaarders en private sekuriteit aangesluit toe hulle ‘n deursoekings- en beslagleggingslasbrief uitgevoer het in terme van die Doeane- en Aksynswet.
Die operasie het gelei tot die beslaglegging op 10 000 vervalste items asook etikette en verpakking wat bekende handelsmerke naboots. Groot hoeveelhede vervalste handelsmerk-selfoonbykomstighede soos oortreksels, batterye, laaiers en oorfone is ook in versteekte bergings wat vir die doel gebou is, gevind.
Die polisie het boonop 18 onwettige buitelanders van verskillende nasionaliteite gearresteer vir die oortreding van die Immigrasiewet, waarvan een verdagte ook aangekla word vir die oortreding van die Wet op Kubermisdade.
