‘n Zimbabwiese sakeman is Sondag buite sy werkplek ontvoer en die polisie het sowat 24 uur later arrestasies uitgevoer.
Die polisie het 14 mense in hegtenis geneem wat na bewering deel is van ‘n ontvoeringsindikaat in Gauteng.
Owerhede het die ontvoering van ‘n Zimbabwiese sakeman ondersoek, met bewyse wat hulle na verskeie plekke rondom Johannesburg gelei het.
Bygestaan deur private sekuriteit en verskeie ander polisie-eenhede, het die teenontvoeringstaakspan Maandag in Greenstone Park en Sandton arrestasies uitgevoer, terwyl die sakeman in Soweto gered is.
Verskeie buitelanders betrokke
Onder die 14 verdagtes wat vasgetrek is, waarvan sommige vroue was, was drie Chinese burgers en twee Mosambiekers.
Agt van die verdagtes is in Greenstone Park in hegtenis geneem, terwyl die oorblywendes in Sandton aangekeer is.
Op die tonele het die polisie spoedpuntmasjiene, kontant wat na bewering uit slagoffers se bankrekeninge getrek is en ‘n vuurwapen wat tydens ‘n huisroof in Linden gesteel is, gevind.
“Die polisie kon die afgelope weke ‘n aantal ontvoerders onderskep wat met sindikate verbind word wat sakemanne ontvoer en groot bedrae as losprys eis,” het nasionale polisiewoordvoerder brigadier Athlenda Mathe gesê.
“Gemeenskappe word versoek om voort te gaan om verdagte aktiwiteite in en om hul omgewing aan te meld om te verseker dat ons beslissend teen hierdie misdadigers beslissend optree,” het sy bygevoeg.
