Benjamin Bezuidenhout het vermis geraak nadat hy glo in die see noord van Sami, in die omgewing van die eiland Kefalonia, vrygeduik het.
’n Suid-Afrikaanse ma is hartseer gelaat nadat die lyk van haar 20-jarige seun wat aan die kus van Griekeland gaan duik het Vrydag gevind is in ’n tragiese voorval wat die gemeenskap van Knysna aangegryp het.
Na verneem word, het Benjamin Bezuidenhout wat Donderdag vermis geraak het, glo vry geduik in die see noord van Sami, in die omgewing van die eiland Kefalonia.
Toe die voormalige Hoërskool Knysna-leerling nie terugkom nie, het alarmklokke gelui, en ‘n volskaalse soektog het begin, berig The Greek City Times.
“Die Hellenic Coast Guard, private vaartuie, ‘n duiker en ‘n Hellenic Air Force-helikopter het aan die soektog deelgeneem. Ongelukkig is die jong man se liggaam gevind naby die area waar hy laas gesien is.
Die presiese omstandighede rondom sy dood bly onduidelik. Daar word egter geglo dat hy in ‘n sterk stroom vasgevang is en moontlik ‘n rots getref het,” het die koerant berig.
Bezuidenhout se ma Marisha is verpletter deur haar seuns se dood
“Dit is met groot hartseer en ‘n gebroke hart dat ek bevestig dat my seun se liggaam gevind is waar die boot geanker was. Ek wil elke persoon bedank vir die boodskappe, deel, verbindings, aanbiedinge om te help,” het sy in ‘n sosiale media-plasing gesê.
Hoërskool Knysna het sy meegevoel aan Bezuidenhout se familie oorgedra.
“Dit is met leedwese dat ons verneem van die heengaan van Benjamin Bezuidenhout (matriek 2022). Ons innige simpatie met sy ouers en familie,” het die skool op Facebook gesê.
Volkskrag betuig sy innige simpatie met die verlies van ‘n jong lewe.
