Die polisie in Gauteng het een persoon in hegtenis geneem vir die moord en poging tot moord op twee top Heidelbergse misdaadbestryders.
Flip Minnaar, voorsitter van die Heidelberg-gemeenskapspolisiëringsforum (GPF), is kritiek beseer, terwyl sy kollega Etienne du Preez dood is kort nadat hulle ‘n misdaadvoorkomingsvergadering by ‘n plaaslike restaurant bygewoon het.
Polisiewoordvoerder luitenant-kolonel Mavela Masondo sê die verdagte is Maandag in hegtenis geneem.
“Die Gautengse adjunkpolisiekommissaris verantwoordelik vir misdaadopsporing, generaal-majoor Mbuso Khumalo, het die span gelei om te verseker dat die verdagte opgespoor en gearresteer word,” het hy gesê.
Die 30-jarige man sal na verwagting Woensdag in die Heidelberg-landdroshof verskyn.
News24 het vroeër berig die aanval het op 3 Julie plaasgevind, kort nadat Minnaar en Du Preez ‘n vergadering by ‘n plaaslike restaurant in Ueckermannstraat afgesluit het.
Volgens Willem Sprong, ‘n verteenwoordiger van die Heidelberg GPF, het ‘n man op ‘n motorfiets hulle in ‘n stegie ingewag en toe hulle by die restaurant uitstap, het hy op albei van hulle geskiet.
Die mans is na die plaaslike hospitaal gehaas, waar Du Preez dood verklaar is.
Sprong het gesê Minnaar was steeds in die hospitaal.
“Hy herstel goed, maar het ’n lang pad na herstel,” het hy gesê.
Minnaar en Du Preez was uitvoerende komiteelede van die GPF.
