’n 39-jarige bestuurder van Kimberley in die Noord-Kaap is in hegtenis geneem ná ’n tref-en-trap-voorval wat die lewe van ’n 16-jarige seun geëis het.
Die bestuurder wat vermoedelik dronk was, het na bewering die tiener omgery nadat hy nie ag geslaan het op ‘n vierrigtingstop nie.
In sy poging om van die toneel te ontsnap, het dieselfde bestuurder na bewering in ‘n taxi met 14 insittendes vasgery.
Die passasiers het ligte beserings opgedoen en is na ‘n plaaslike hospitaal vervoer vir behandeling.
Polisiewoordvoerder, Sergio Kock, sê, “’n Nissan Navara-bakkie het na bewering sonder om te stop by ‘n vierrigtingstop in Homelite, Noord-Kaap, in die voetganger vasgery. Dieselfde Nissan Navara het na bewering agter in ‘n taxi vasgery wat by ‘n rooi robot in Homestead gestaan het. Al 14 insittendes is hospitaal toe geneem vir mediese behandeling. Die 39-jarige manlike bestuurder van die Nissan Navara is in hegtenis geneem en aangekla van strafbare manslag, bestuur onder die invloed van alkohol, roekelose en nalatige bestuur en die versuim om op ‘n ongelukstoneel te stop.”
Intussen is ‘n 7 maande swanger vrou per helikopter na die naaste hospitaal geneem ná ‘n ongeluk tussen twee voertuie op die R617 by Mpopohomeni in die KwaZulu-Natalse middellande.
Roland Robertson, woordvoerder van die mediese nooddienste, sê die pasiënt het gevorderde lewensondersteunende behandeling nodig gehad.
Robertson sê een ander persoon het ligte beserings opgedoen en is na die hospitaal vervoer vir verdere sorg.
