In ’n gebied waarvan jy waarskynlik nog nooit gehoor het nie, is die grootste beweging van landsoogdiere op die planeet aan die gang.
Elke jaar migreer miljoene witoorkob, Mongalla-gaselle, tiang en Bohor-rietbokke oor die Boma Badingilo Jonglei-landskap in Suid-Soedan. ’n Opname wat pas voltooi is deur African Parks en die Soedanese Wildleweministerie het sowat ses miljoen wildsbokke getel.
Die bevindinge bevestig ‘n merkwaardige en ongeëwenaarde natuurlewe-verskynsel in ‘n landskap van geweldige ekologiese belang wat grootliks onbekend is aan die res van die wêreld.
Die opname het 122 774 km2 gedek, wat die hele bekende reeks van die vier hoof migrerende wildsbokspesies in die Groot Nyl-migrasie insluit. Data van 251 spoorhalsbande op groot soogdiere is ook geïntegreer, wat ‘n wye begrip bied van die streek se ekologiese dinamika wat dele van Suid-Soedan en Ethiopië insluit.
Salva Kiir Mayardit, president van Suid-Soedan, het met die aankondiging van die opnameresultate gesê dit bevestig dat die land ryk bly aan biodiversiteit met van Afrika se mooiste diere.
“Die resultate van hierdie opname is niks minder as verbysterend nie,” sê Peter Fearnhead, uitvoerende hoof van African Parks.
“Die verstommende omvang van die migrasie word slegs geëwenaar deur die verantwoordelikheid om te verseker dat dit in die toekoms in ‘n uiters komplekse landskap oorleef.”
Oorlog en kommersiële stropery was ‘n voortdurende bedreiging vir die migrasie.
“Hierdie natuurlewe en groter ekosisteem is die basis vir oorlewing vir verskeie etniese groepe wat dikwels in konflik met mekaar is oor hulpbronne,” het Fearnhead gesê.
“Suksesvolle bestuur van hierdie landskap sal slegs moontlik wees deur vertroue met en tussen hierdie etniese groepe te bou.”
Baie etniese groepe woon binne die Boma Badingilo Jonglei-landskap, insluitend die Dinka, Murle, Anyuak, Jie, Toposa, Nyangatom, Nuer, Mudari, Bari, Lokyoya, Madi, Lolubo, Ari, Lopit, Latuka, Boya en Didinga. Elkeen van hierdie gemeenskappe het diep kulturele tradisies en aktiwiteite wat stewig ingebed is en sterk op wild aangewese is.
Die gekombineerde opname van witoorkob, tiang, Mongalla-gaselle en Bohor-rietbokke het net minder as 5 900 000 individue getel. Geen swartrenosters is gesien nie – hulle het vermoedelik in die 1980’s uitgesterf. Sebras is ook sedert 2008 nie in die gebied gesien nie, en buffels was afwesig behalwe aan die periferie van die Sudd-moeras en langs die Ethiopiese grens naby Gambella.
Die opnamevlugte het massiewe bevolkings van oopbek-, maraboe-, geelbek-, Abdim- en wolnekooievaars, swartkroonkraanvoëls, reiers en verskeie spesies aasvoëls teëgekom.
Die opname het twee vliegtuie gebruik wat toegerus is met kameras wat meer as 330 000 beelde geneem het. ‘n Span van sewe gegradueerdes van die Universiteit van Juba, opgelei in gespesialiseerde sagteware, het 59 718 foto’s oor 64 transekte ontleed om die teenwoordigheid van wild te dokumenteer.
Geleë in die ooste van Suid-Soedan, vorm die Boma Badingilo Jonglei-landskap deel van ‘n groter 200 000 km2-ekosisteem wat oos van die Nyl strek, wat Sentraal-Ekwatoria-staat, Oostelike Ekwatoria-staat, Jonglei-staat en die Groter Pibor-administratiewe gebied dek. Hierdie ontsaglike landskap is van kritieke belang vir die Sudd-moerasse – die grootste vleilande in Afrika en die tweede grootste ter wêreld.
African Parks, wat die opname gedoen het, is ‘n nie-winsgewende bewaringsorganisasie wat die verantwoordelikheid aanvaar vir die rehabilitasie en langtermynbestuur van beskermde gebiede in vennootskap met regerings en plaaslike gemeenskappe.
Dit bestuur tans 22 nasionale parke en beskermde gebiede in 12 lande wat meer as 20 miljoen hektaar beslaan in Angola, Benin, Sentraal-Afrikaanse Republiek, Tsjad, Demokratiese Republiek van die Kongo, Malawi, Mosambiek, die Republiek van die Kongo, Rwanda, Suid-Soedan, Zambië en Zimbabwe.
Dit het onlangs die plaas gekoop wat deur die renosterteler John Hume besit word en is tans besig om sy 2 000 renosters na beskermde gebiede regoor die vasteland te hervestig.
(Daily Maverick)
