Die gemeenskap van Villeria in die Moot Area is geskok oor die eerste aangemelde ysterpen lokval-voorval, wat groot kommer onder inwoners en plaaslike owerhede veroorsaak het.
’n Motoris het by die verkeersirkel tussen Laerskool Pierneef en Daily Fresh oor spykers gery wat op die pad geplaas is, wat groot kommer onder inwoners en plaaslike owerhede veroorsaak het.
Stadsraadslid Roelof Fourie het sy kommer uitgespreek toe hy die nuus gehoor het. “As dit wel ‘spiking’ is,soos wat op die snelweë gebeur, is dit vir my hartseer nuus om te verneem dat dit nou ook in voorstedelike gebiede gebeur – in die Moot, of enige ander gebied ingesluit.”
Hy herinner die publiek ook aan die veiligheidmaatreëls. “Dit is belangrik om die veiligheidsmaatreëls en wenke wat voorgeskryf is vir hierdie gebeure te volg. Dit is ook belangrik om dit aan die SAPD en TMPD te rapporteer. Die TMPD en SAPD werk reeds saam om hierdie lafhartige misdaad te bekamp.”
Burgemeester Cilliers Brink het die stad se voortdurende pogings om motorband-ysterpenlokvalle te bekamp uitgelig. “Op Donderdagaand, 13 Junie het ek by die TMPD en SAPD se snelwegpatrolliespanne aangesluit wat brandpunte in Tshwane monitor. Die TMPD het die ontplooiing van snelwegpatrollie sedert Januarie vanjaar verhoog in ’n poging om padveiligheid in die nag te verbeter en om polisiesigbaarheid te verhoog,” het Brink gesê.
Oor die afgelope vyf maande het die TMPD-snelwegpatrolliespanne meer as 200 motoriste bygestaan gedurende motorband-ysterpenlokval voorvalle snags, insluitend gebarste bande, brandstoftekorte en meganiese foute.
Hulle het ook drie voertuie wat betrokke was in motorband-ysterpenlokval voorvalle op die N14/Eeufeespad bygestaan.
Ten spyte van hierdie pogings, is nog twee motorband-ysterpenlokval voorvalle die aand van die operasie aangemeld.
“Die stad is ernstig daaroor om die plaag van motorband-ysterpenlokvalle te bestry.”
Die volgende roetes is as brandpuntgebiede geïdentifiseer:
– N1 noord tussen die N4 oos en Maubane
– N4 oos tussen die N1 noord en Brokhorstspruit
– N4 wes tussen die N1 noord en Brits Toll Plaza
– R80 tussen Es’kia Mphahlele-rylaan en Soshanguve.
Hy het beklemtoon dat motoriste moet verseker dat hul voertuie padwaardig is en genoeg brandstof het, veral wanneer hulle in die aande bestuur.
In die geval van ’n motorband-ysterpenlokval voorval word motoriste aangeraai om nie stil te hou nie, maar om stadig na ’n veilige plek te ry en die SAPD of die TMPD te bel.
“Ek wil graag die SAPD en ons TMPD-snelwegpatrolliespanne bedank vir hul volgehoue pogings om padveiligheid te verbeter. Die motorband-ysterpenlokvalle is nie ’n maklike misdaad vir die polisie nie; ons spanne is egter elke aand daar buite en probeer hul bes,” het Brink afgesluit.
Die Moot-gemeenskap word versoek om waaksaam te bly en enige verdagte aktiwiteite by die owerhede aan te meld.
(Rekord)
