‘n Polisiekonstabel wat as ‘n hofordonnans by die plaaslike landdroshof werk is in hegtenis ná ‘n man gekaap is.
‘n 35-jarige Polisiekonstabel van Ermelo is Sondag in hegtenis geneem op aanklag van motorkaping en die besit van ‘n vermoedelik gesteelde voertuig.
Die inhegtenisname volg op ‘n voorval waarin ‘n 37-jarige man op Saterdag van sy Volkswagen Polo gekaap is. Die kaping het plaasgevind terwyl die slagoffer van Lothair na Ermelo onderweg was.
Nadat hy by ‘n vulstasie in Ermelo stilgehou het, het hy twee manlike rylopers opgelaai wat hom daarna op die agtersitplek van sy motor gedwing het.
Die verdagtes het op die N11 na Hendrina gery en die slagoffer gedwing om sy bankkaart se kode bekend te maak.
Dit word verneem dat die verdagtes toe ‘n medepligtige geskakel het wat saam met ‘n ander individu in ‘n BMW opgedaag het.
Hulle het na Breyten gery, waar hulle ‘n onbekende bedrag geld uit die slagoffer se rekening by ‘n OTM onttrek het.
Terwyl die verdagtes probeer het om die slagoffer in die BMW oor te plaas, het hy daarin geslaag om te ontsnap en in die donkerte verdwyn.
Die voorval is by die Ermelo-polisie aangemeld.
’n Motoropsporingsmaatskappy het die polisie bygestaan deur inligting te verskaf oor waar die gekaapte Polo is.
Die polisie het die voertuig agternagesit, maar die verdagte wat die Polo bestuur het, het die voertuig verlaat en gevlug.
Die volgende dag het die slagoffer die BMW wat by die voorval betrokke was, by ‘n motorwassery in Ermelo opgemerk.
Die polisie het vinnig gereageer, die verdagte in hegtenis geneem en beslag gelê op die BMW, wat ook as gesteel aangemeld is.
Die verdagte, ‘n polisiekonstabel wat as ‘n hofordonnans by die Ermelo-landdroshof werk, staan nou tereg op aanklagte van motorkaping en die besit van vermoedelik gesteelde eiendom.
