FOTO TER ILLUSTRASIE
’n 80-jarige man is verlede week in ’n ouetehuis naby Brits vermoor toe mede-inwoners (92 en 75 jaar oud) hom met krukke aangeval het.
Volgens polisiewoordvoerder, luitenant-kolonel Amanda Funani, het die moord gevolg op ‘n bakleiery tussen drie bejaarde mans in ‘n ouetehuis in Jerigo. “Volgens inligting het die 80-jarige Godfrey Thema Motsepe Donderdag 30 Mei omstreeks 04:00 uit die badkamer gekom en twee mede-inwoners, Jeremiah Mmatli (75) en Daniel Madumo (92) teëgekom. Die oorledene het na bewering op een van hulle gestamp wat hom met sy krukke geslaan het. Sy metgesel het aan die bakleiery deelgeneem en albei het die slagoffer aangerand,” het Funani gesê.
“Die eienaar van die ouetehuis is in kennis gestel en die polisie is ontbied. Die slagoffer wat kopbeserings opgedoen het, is per ambulans hospitaal toe vervoer, maar is met sy aankoms dood verklaar. Die twee bejaarde verdagtes is later vir moord in hegtenis geneem.”
Mmatli en Madumo het Maandag in die Brits-landdroshof verskyn. Hul saak is uitgestel tot Vrydag, 7 Junie 2024, vir formele borgtogaansoek. Die provinsiale polisiekommissaris, luitenant-generaal Sello Kwena het sy skok oor die voorval uitgespreek en sy meegevoel aan die slagoffer se familie oorgedra.
Die Moral Regeneration Movement (MRM) in Noordwes het gevra dat die voorval by die ouetehuis ondersoek word. “Ons is uiters bekommerd oor die vlak van onverdraagsaamheid en uiterste gewelddadige gedrag wat moontlike afknouery suggereer onder die mees kwesbares in ons samelewing wat tot die fasiliteit opgeneem is om hul veiligheid en welstand te waarborg,” sê pastoor Lesiba Kgwele van die Moral Regeneration Movement (MRM). ) Provinsiale Tussentydse Komitee.
“Vreedsame saambestaan is veronderstel om die omgewing by die ouetehuis te kenmerk. Terwyl ons vol vertroue is dat die reg sy loop sal neem, doen ons ‘n beroep op owerhede om tot die bodem van die saak te kom en te verseker dat berading en psigososiale ondersteuningsdienste aan die inwoners en personeel by die ouetehuis gebied word,” het hy gesê.
