Twee Mosambiekse burgers wat van die moord op Nomakephu Thoma in Potchefstroom aangekla word, sal vandag voor die Potchefstroomse landdroshof verskyn.
Volgens Sabata Mokgwabone, polisiewoordvoerder in Noordwes, is een van die verdagtes vermoedelik die slagoffer se eks-kêrel. Hy het haar na bewering ontvoer en losprys van haar familie geëis.
Mokgwabone sê, “Volgens berigte is Thoma deur haar eks-kêrel geneem wat later boodskappe aan die familie gestuur het om losprys te eis. Die ondersoekspan het inligting saamgevoeg en deur ander ondersoek hulpmiddels die eerste verdagte na Lenasia opgespoor waar hy uiteindelik gearresteer is.”
“Hierna het die verdagte erken dat hy verantwoordelik was vir die slagoffer se moord en die polisie na die toneel tussen Ikageng uitbreiding 7 en Promosa geneem waar die slagoffer se liggaam na bewering verbrand is deur ‘n persoon wat hy gehuur het.”
Die verdagtes staar ook ‘n klag van ontvoering in die gesig, en daar is ‘n moontlikheid van ‘n bykomende aanklag vir die oortreding van die Immigrasiewet van 2002.
SABC Nuus
